كەشە «قازمەديا ورتالىعىندا» پرەزيدەنت نۇرسۇلتان نازارباەۆتىڭ ۇكىمەتتىڭ كەڭەيتىلگەن وتىرىسىندا بەرگەن تاپسىرمالارى مەن ايتقان سىن-ەسكەرتپەلەرى تۋرالى ءوز ويىن سەناتور سەرگەي پلوتنيكوۆ ورتاعا سالدى.
كەشە «قازمەديا ورتالىعىندا» پرەزيدەنت نۇرسۇلتان نازارباەۆتىڭ ۇكىمەتتىڭ كەڭەيتىلگەن وتىرىسىندا بەرگەن تاپسىرمالارى مەن ايتقان سىن-ەسكەرتپەلەرى تۋرالى ءوز ويىن سەناتور سەرگەي پلوتنيكوۆ ورتاعا سالدى.
قارجى جانە بيۋدجەت كوميتەتىنىڭ مۇشەسى سەرگەي پلوتنيكوۆ ءوزىنىڭ سوزىندە پرەزيدەنت جاريالاعان «قازاقستان-2050» ستراتەگياسىن قولداۋعا باعىتتالعان پىكىرلەرى مەن ەلدەگى ماكروەكونوميكالىق تۇراقتىلىقتى ساقتاۋ ءۇشىن نە ىستەۋ كەرەكتىگىن ورتاعا سالدى. سونىڭ ىشىندە ول جولداۋدىڭ ەلىمىزدىڭ ماكروەكونوميكالىق جاعدايىن وڭالتۋعا ارنالعانىن, اسىرەسە, بيۋدجەتتىك ساياساتتى جەتىلدىرۋدى كوزدەيتىنىن جەتكىزدى. وسى ماقساتتى ورىنداۋ ءۇشىن ەكى ءتۇرلى تۇجىرىم قابىلداندى. ونىڭ ءبىرىنشىسى – جاڭا بيۋدجەتتىك ساياسات جانە ەكىنشىسى – ناتيجەلىلىكتى باعدارعا الا وتىرىپ, مەملەكەتتىك جوسپارلاۋ جۇيەسىن جەتىلدىرۋ.
ءبىرىنشى تۇجىرىم ەلدىڭ قارجىلىق جاعدايىن تۇراقتاندىرۋدى, بيۋدجەتتىك شىعىنداردىڭ ناتيجەلىلىگىن ارتتىرۋدى ماقسات ەتەدى; ەكىنشى تۇجىرىم تەڭگەرىمدى ستراتەگيالىق, ەكونوميكالىق, بيۋدجەتتىك جوسپارلاۋدى جەتىلدىرۋگە باعىتتالعان. وسى ماقساتتاردى ورىنداۋ ءۇشىن بىرنەشە زاڭنامالىق قۇجاتتارعا وزگەرىستەر مەن تولىقتىرۋلار ەنگىزۋ جونىندەگى زاڭ جوبالارى ازىرلەندى. قازىر ولار سەناتتىڭ كوميتەتتەرىندە تالقىلانۋ ۇستىندە, دەدى ول.
سونداي-اق, سەناتور ءوزىنىڭ سوزىندە ماكروەكونوميكالىق تۇراقتىلىق پەن مەملەكەتتىك بيۋدجەتتىڭ تەڭگەرىمدىلىگىن ساقتاۋ ءۇشىن ۇكىمەت نە ىستەۋى كەرەك دەگەنگە توقتالىپ, ول ءۇشىن بيۋدجەت ساياساتى تاپشىلىقتى ازايتۋعا باعىتتالعان ەرەجەنى نىق ۇستانعانى ماقۇل ەكەنىن ايتتى. 2020 جىلعا دەيىنگى ارالىقتا بيۋدجەت تاپشىلىعىن ءىجو-ءنىڭ 1,4 پايىزىنداي دەڭگەيگە ءتۇسىرۋ كەرەك. ۇلتتىق قوردىڭ قاراجاتى تەك شەكتەۋلى كولەمدە جۇمسالعانى دۇرىس. بيۋدجەتتىڭ شىعىس بولىگىنىڭ ارتۋى تەك سالىقتىڭ كوبەيۋى ەسەبىنەن بولعانى ءجون. 2018 جىلعا دەيىن اعىمداعى شىعىستاردىڭ ءبارىن مۇناي سەكتورىنىڭ تابىسىنان ەمەس, باسقا تۇسىمدەر ارقىلى جابۋ جوسپارلانىپ وتىر, دەدى ول.
جاقسىباي سامرات,
«ەگەمەن قازاقستان».