جامبىل وبلىسىندا جۇمىسپەن قامتۋدىڭ جول كارتاسى اياسىندا جۇزەگە اسىرىلاتىن جوبالار ارقىلى 2020 جىلى 9 544 ادام جۇمىسقا ورنالاستى.
سەرگەي بەلوۆ جامبىل وبلىسىنىڭ قورداي اۋدانىندا جول جوندەۋشى بولىپ جۇمىس ىستەيدى. جالپى, بۇل جەردە جۇمىسپەن قامتۋ ورتالىعى ارقىلى ەڭبەكپەن قامتىلعان 108 ادام ەڭبەك ەتەدى.
«مەن ۇزاق ۋاقىت بويى دۇرىس جۇمىس تابا المادىم. سودان دوستارىم جۇمىسپەن قامتۋ ورتالىعىنا جۇگىنۋگە كەڭەس بەرىپ, وندا ماۋسىم ايىندا جۇمىسسىز رەتىندە تىركەلدىم. باعدارلاما بويىنشا مەنى جول جوندەۋگە جىبەرىپ, تۇراقتى جالاقى تاعايىندالدى», دەيدى ول.
وبلىس اكىمدىگىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتى بويىنشا, وڭىردە جەرگىلىكتى تۇرعىنداردىڭ ءومىر ءسۇرۋ ساپاسىن جاقسارتۋعا باعىتتالعان 828 جوبا جۇزەگە اسىرىلۋدا. ونىڭ ىشىندە مەكتەپتەر سالىنىپ, نىساندارعا اعىمداعى جانە كۇردەلى جوندەۋ جۇمىستارى جۇرگىزىلۋدە. ماسەلەن, جامبىل اۋىلىندا 100 ورىندىق مەكتەپ سالىنىپ جاتىر. جوبادا جۇمىسپەن قامتۋ ورتالىعى ارقىلى ورنالاسقان 148 ادام جۇمىس ىستەيدى. وسىلايشا قاجەتتى ءىس-قيمىل اياقتالعاننان كەيىن اۋىل بالالارىنا اۋدان ورتالىعىنا وقۋعا سابىلۋدىڭ قاجەتى بولمايدى.
«وبلىسىمىزدا جۇزەگە اسىرىلىپ جاتقان جوبالاردىڭ ەڭ كوپ سانى ماڭىزدى الەۋمەتتىك نىسانداردى قايتا قۇرۋ جانە كۇردەلى جوندەۋ جۇمىستارىن جۇرگىزۋگە باعىتتالعان. سونىمەن قاتار جول كارتاسى ارقىلى ءبىز قازىردىڭ وزىندە 9 544 قازاقستاندىققا جۇمىس تابۋعا كومەكتەستىك», دەدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى جورابەك باۋبەكوۆ.
بۇدان بۇرىن حابارلانعانداي, اعىمداعى جىلدىڭ 8 ايىندا رەسپۋبليكا بويىنشا جول كارتاسى اياسىندا بارلىعى 165 مىڭ جۇمىس ورنى قۇرىلعان 6,4 مىڭ جوبانى ىسكە اسىرۋ باستالدى. ونىڭ ىشىندە 100 مىڭعا جۋىق ادام جۇمىسپەن قامتۋ ورتالىعى ارقىلى جۇمىسپەن قامتىلدى. جالپى, جول كارتاسى بويىنشا 255 مىڭ جۇمىس ورنىن قۇرۋ جوسپارلانۋدا. سونىمەن قاتار جول كارتاسىنىڭ جوبالارى بولاشاقتا 100 مىڭنان استام تۇراقتى جۇمىس ورنىن اشۋعا ارقاۋ بولادى.
جامبىل وبلىسى