بۇگىنگى تاڭدا جاستارعا كاسىپتىك-تەحنيكالىق ءبىلىم بەرۋ – وتە ماڭىزدى. كراسنويار اۋىلىنداعى اگروتەحنيكالىق كوللەدجدىڭ كەشەگى ءبىلىم الۋشىلارى قازىر ءوز ماماندىقتارى بويىنشا ابىرويلى ەڭبەك ەتىپ ءجۇر.
وسىنداي جاستاردىڭ ءبىرى قاسىمحان قايىركەنوۆ «ۇماي جەر» جاۋاپكەرشىلىگى شەكتەۋلى سەرىكتەستىگىندە كومباينشى بولىپ ىستەيدى. ارىپتەستەرى جاس كومباينشىنىڭ بويىنداعى تەوريالىق ءبىلىم مەن ءوز ماماندىعىنا دەگەن سۇيىسپەنشىلىگىن جوعارى باعالايدى. ويكەنى قاسىمحان كوللەدجدە وقىپ جۇرگەن كەزىندە وسى شارۋاشىلىقتا تاجىريبەدەن ءوتتى. تاجىريبەلىك جۇمىس بارىسىندا ءوزىن جاقسى جاعىنان كورسەتە ءبىلدى. ءاردايىم جۇمىسقا ىنتالى ءارى تاباندى جاستىڭ قولىنان ءىس كەلەتىنىنە سەنىم بىلدىرگەن شارۋاشىلىق باسشىلارى اتالعان كوللەدجدى ءبىتىرىپ كەلگەن سوڭ بىردەن جۇمىسقا قابىلدادى.
– كومباينشى بولۋ وڭاي-وسپاق شارۋا ەمەس, – دەيدى قاسىمحاننىڭ ءوزى, – كۇزگى ەگىن وراعى كەزىندە ۋاقىتپەن ساناسپاي جۇمىس ىستەۋ كەرەك ەكەن. ونىڭ ۇستىنە تەحنيكانى بۇگە-شىگەسىنە دەيىن مەڭگەرگەنىڭ ءجون. وسى ورايدا كوللەدجدە تياناقتى ءبىلىم بەرگەن ۇستازدارىما ايتار العىسىم مول. سول ءبىلىمنىڭ ناتيجەسىندە جاڭا تەحنيكانىڭ قىر-سىرىن يگەرىپ, تاجىريبەسى تولىسقان اعا بۋىندى وكشەلەي ەڭبەك ەتۋدەمىز. مەن اۋەل باستا وسى ماماندىقتى تاڭداپ العانىما قۋانىشتىمىن. ويتكەنى «اس اتاسى – نان» دەمەكشى, دالا ەرلەرىنىڭ اق ادال ەڭبەكتەرىنىڭ وتە ابىرويلى شارۋا ەكەندىگىنە كوزىم انىق جەتىپ وتىر. ءبىز ەلدىڭ ىرىسى مەن بەرەكەسىن كەلتىرۋگە تىرىسۋدامىز.
ادەتتە, جاستارعا دەگەن سەنىم ولاردىڭ بويىنداعى كاسىبي بىلىكتىلىككە قاراي ورنىعادى. ماسەلەگە وسى تۇرعىدان كەلگەندە كوللەدج وقۋشىلارىنىڭ زاماناۋي تەحنيكانى يگەرۋگە دەگەن ىنتاسىنىڭ زورلىعىن جانە سول تالاپ بيىگىنەن شىعىپ وتىرعاندىعىن ايقىن كورۋگە بولادى. ەگەر ەلىمىزدىڭ ءاربىر جاسى قاسىمحان قۇربىلارىنداي بولسا, اۋىل شارۋاشىلىعى دا, وزگە سالالار دا قارىشتاپ العا جىلجيتىندىعىنا كۇمان جوق.
بيىل العاش رەت استىق جولىنداعى ارپالىسقا قاتىسىپ, ابدەن شىڭدالعان قاسىمحانداردىڭ الار بيىگى الدا. ىلكىدەن جالعاسقان ەڭبەك تاجىريبەسىن جەتە مەڭگەرسە, كاسىپتىك-تەحنيكالىق كوللەدجدەگى تەوريالىق بىلىممەن ۇشتاستىرسا, دالا توسىندە تابانى تاستان تايماعان تارلانبوزداي ەسەلى ەڭبەك ەتكەن داڭعايىر ديقانداردىڭ جولىن جالعاستىراتىن بولادى.
قازىر العاشقى ەگىن وراعىندا ءتاپ-ءتاۋىر تاجىريبە جيناپ شىڭدالعان قاسىمحان وزىنەن كەيىنگى بۋىنعا تالىمگەر بولىپ ءجۇر.
اقمولا وبلىسى