الماتىدا قالا كۇنىنە وراي ماقاتاەۆ, ماحاببات اتىنداعى جانە 12 شاعىن اۋدانداعى ساياباقتاردى جوندەۋ جۇمىستارى اياقتالدى. اتالمىش جوبالار «بيزنەستىڭ جول كارتاسى 2020» باعدارلاماسى اياسىندا جۇزەگە اسىرىلدى, دەپ حابارلايدى Egemen.kz.
اتاپ ايتقاندا, اۋەزوۆ اۋدانىنىڭ 12-ءشى شاعىن اۋدانىنداعى ساياباق اۋماعىندا سىرتقى جارىقتاندىرۋدىڭ 50 بىرلىگى ورناتىلىپ, اۋماق جابىنمەن, سونىڭ ىشىندە گازونمەن قامتاماسىز ەتىلدى.
المالى اۋدانىندا ورنالاسقان ماقاتاەۆ اتىنداعى ساياباق اۋماعى 4,8 مىڭ شارشى مەتر بولاتىن ۋچاسكەنى كوگالداندىرۋ جۇمىستارى جۇرگىزىلدى. «ماحاببات» سكۆەرى دە المالى اۋدانىنىڭ اۋماعىندا ورنالاسقان, مۇندا دا وسىعان ۇقساس جۇمىستار اياقتالدى.
جالپى, قالا تۇرعىندارىنىڭ قولايلى دەمالىسى ءۇشىن قاجەتتى جاعدايدى جاساي وتىرىپ, اتالعان جوبالاردى جۇزەگە اسىرۋ قالانىڭ ينفراقۇرىلىمىن جاقسارتۋعا مۇمكىندىك بەرەدى.
«ساياباق – شىعارماشىلىق ينتەلليگەنتسيانى, جاس اقىندار جانە جازۋشىلاردى تارتاتىن ورىنعا اينالۋى ءتيىس. وسى ورىننىڭ اتموسفەراسى شىعارماشىلىققا شابىتتاندىراتىنداي جاعدايى جاسالۋى كەرەك دەگەن مىندەت قويدىم», – دەدى الماتى قالاسىنىڭ اكىمى باقىتجان ساعىنتاەۆ.
سونىمەن بىرگە اتالعان جوبالار جۇمىس ورىندارىنىڭ قۇرىلۋىن قاراستىرادى. مەگاپوليستە «جۇمىسپەن قامتۋدىڭ جول كارتاسى» باعدارلاماسى بويىنشا ينفراقۇرىلىمدىق 214 جوبانى جۇزەگە اسىرۋ ءۇشىن 26 مىڭ جاڭا جۇمىس ورنىن قۇرۋ جوسپارلانۋدا. سول ارقىلى قىزمەتكەرلەردىڭ كەمىندە 50 پايىزىن حالىقتى جۇمىسپەن قامتۋ ورتالىقتارى ارقىلى قامتاماسىز ەتۋ كوزدەلگەن.