جازى جابىرقاۋ, كۇن ساۋلەسى كەمشىن ءبىزدىڭ وڭىردە ءبۇيىرى تولىق, ءدامى ءتىل ۇيىرەتىن قاربىز وسەدى دەۋ ادام سەنگىسىز جاڭالىق. بۇرىن-سوڭدى بولىپ كورمەگەن قىزىق جاي بيىل ورىن الدى, دەپ حابارلايدى Egemen.kz.
قاربىز كادىمگىدەي قۇنارلى القاپتا ەمەس, مەكەمەنىڭ اۋلاسىندا بوس جاتقان توقىمداي جەرگە ەگىلىپتى. "ۇلتتىق ساراپتاۋ جانە سەرتيفيكاتتاۋ ورتالىعى" وبلىستىق فيليالىنىڭ قىزمەتكەرلەرى الگى جەردەن الپىستان استام قاربىز جيناپ الىپتى. كورگەننىڭ ءبارى تاڭ-تاماشا. ايتۋلارىنا قاراعاندا, ەلوردادان ءارتۇرلى جەمىس ءدانىن ارنايى اكەلىپ, اۋلاعا وتىرعىزۋ تاجىريبەسى بار ەكەن.
بۇل جولى استراحاندىق قاربىز تۇقىمىن ماماردىڭ ورتاسىندا توپىراققا سىڭىرگەن. ايتسە دە, العاشقى بەتتە شىعار ما, شىقپاس پا ەكەن دەپ كوڭىلدەرى دە كۇپتى بولعانعا ۇقسايدى. قىلتيىپ كورىنگەن سوڭ قۇلاعىنان تارتقانداي ەڭبەكتەرىن ءسىڭىرىپتى. كۇن سايىن سۋارىپ, ماڭايىنداعى ءارامشوبىن ج ۇلىپ, بالاداي باپتاعان.
ءسىرا, بيىلعى جىلدىڭ قارا قارعانىڭ ميى قاينايتىنداي ىستىعى اسەر ەتكەن بولۋى كەرەك, العاشقى ونىمنەن وزدەرى ءدام تاتىپتى. ورتاشا سالماعى 14 كەلىگە جەتكەن قاربىز قۇلاقتانعان جۇرتتىڭ قۇشاعىندا كەتكەن. كەلەر جىلى ارنايى ورىن دايىنداماق. كىم ءبىلسىن, باعالى باستاما ەلەڭدەگەن ەل تاراپىنان قولداۋعا يە بولسا, قولات-قويناۋى قازىناعا تۇنىپ تۇرعان كوكشەتاۋدىڭ توسىندە دە قاربىز وسىرۋگە بولاتىن شىعار.
كوكشەتاۋ قالاسى