قازاقستاندىق جاس ءانشى دانەليا تولەشوۆا اقش-تا ءوتىپ جاتقان America' s Got Talent شوۋىنىڭ فينالىنا جولداما الدى, دەپ حابارلايدى Egemen.kz.
"دانەليا تولەشوۆا ءبىر تاۋلىك ىشىندە اقش كورەرمەندەرىنىڭ داۋىس بەرۋ ناتيجەلەرى بويىنشا فاۆوريتتەر قاتارىنان كورىندى. ول الەمدىك شوۋدىڭ فينالىندا ونەر كورسەتۋ مۇمكىندىگىنە يە بولدى. فينالعا ءوتۋ ءۇشىن سىنعا تۇسكەن قاتىسۋشىلاردىڭ ۇشتىگىندە دانەليامەن بىرگە "Golden buzzer"-ءدىڭ ەكى يەگەرى بار. ولار قازىلار القاسىنىڭ ارنايى قولداۋىنا يە بولدى. الايدا كورەرمەندەر قازاقستاندىق انشى دانەليانى قولدادى", - دەپ جازدى دانەليا تولەشوۆانىڭ PR-ديرەكتورى تاتيانا سينەنكو فەيسبۋكتەگى پاراقشاسىندا.
ايتا كەتەيىك, America' s Got Talent 15-كەزەڭىنىڭ فينالى 22 قىركۇيەكتە NBC تەلەارناسىنىڭ تىكەلەي ەفيرىندە وتەدى.
"وسى ۋاقىت ىشىندە مەنى قولداعاندارىڭىز ءۇشىن العىس بىلدىرەمىن. بۇل شەشۋشى اپتا بولماق, كوپ جۇمىس ىستەۋ كەرەك. مەن سىزدەردىڭ ۇمىتتەرىڭىزدى اقتاۋعا تىرىسامىن", – دەدى دانەليا تولەشوۆا.