ەكىباستۇزدا تۇرعىن ءۇي اۋلاسىنا كىرىپ كەتكەن قاسقىردى اتىپ تاستاۋعا تۋرا كەلگەن, دەپ حابارلايدى Egemen.kz
كوپقاباتتى تۇرعىن ءۇي اۋلاسىنا كىرىپ, ەسىك الدىندا جاتقان جابايى اڭدى سول جەردىڭ تۇرعىندارى ۆيدەوعا ءتۇسىرىپ, ينستاگرامعا جۇكتەگەن. بەينە-جازبادان ەر ادامنىڭ "قارواڭىزدار, قاسقىر" دەگەن ءسوزىن ەستۋگە بولادى. ارتىنشا ەسىكتى قالقالاعان ادام قاسقىرعا وق اتىپ ولتىرگەنىن دە بايقاۋعا بولادى.
جەلى قولدانۋشىلارى جۇكتەلگەن ۆيدوعا بايلانىستى ءوز نارازىلىقتارىن ءبىلدىردى. ولاردىڭ ايتۋىنشا, بۇل - پاناسىز جانۋارعا جاسالعان قاتىگەزدىك.
جەرگىلىكتى پوليتسيا قىزمەتكەرلەرى وزدەرىنىڭ وقيعا ورنىنا بارعانىن راستاپ وتىر. دەسە دە, ولار جانۋاردى اتۋعا قاتىسى جوق ەكەنىن مالىمدەدى. سونىمەن قاتار, ەكىباستۇز اكىمدىگىنىڭ قىزمەتكەرلەرى جانۋار ەۆتانيزاتسيالانعانىن حابارلادى.
"بۇگىن تاڭعى ساعات 8-دە ەكىباستۇز قالالىق پوليتسيا ءبولىمىنىڭ كەزەكشىلىگىنە 22-شاعىن اۋدان اۋماعىندا قاسقىر جۇگىرىپ جۇرگەنى تۋرالى قوڭىراۋ كەلىپ ءتۇستى. ۆەتەرينارلىق ستانتسيانىڭ ماماندارى پوليتسيا قىزمەتكەرلەرىمەن بىرگە وقيعا ورنىنا شىعىپ, جابايى جانۋاردى ەۆتانيزاتسيالادى. قاسقىردىڭ ءمايىتى ءارى قاراي ساراپتاۋ ءۇشىن ۆەتەريناريالىق زەرتحاناعا جىبەرىلەدى", دەپ حابارلادى ەكىباستۇز قالاسى اكىمدىگىنىڭ ۆەتەريناريا ءبولىمى.