پرەزيدەنت قاسىم-جومارت توقاەۆ «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا مەملەكەتتىگىمىزدى نىعايتۋ جولىنداعى ەڭ باستى ماسەلەلەرگە نازار اۋدارىپ, قوعام مەن مەملەكەتىمىزدە ستراتەگيالىق باعىتتار بويىنشا قانداي وزگەرتۋلەر جاساۋ كەرەك ەكەنىن ايقىندادى. مەملەكەت باسشىسى باستى قۇجاتتا سىبايلاس جەمقورلىقتى بولدىرماۋ, جولىن كەسۋ ماسەلەسىنە ايرىقشا توقتالدى.
ازاماتتاردىڭ لايىقتى ءومىر سۇرۋىنە جاعداي جاساۋعا, ولاردىڭ قۇقىقتارىن قورعاۋعا, زاڭ ۇستەمدىگىن قامتاماسىز ەتۋگە جانە جەمقورلىققا قارسى كۇرەستى كۇشەيتۋگە مىندەتتىمىز دەپ ايرىقشا اتاپ ءوتتى. جەمقورلىققا اپاراتىن سەبەپتەردى انىقتاۋ ءۇشىن مەملەكەتتىك ورگاندار مەن كۆازيمەملەكەتتىك سەكتوردىڭ نورماتيۆتىك اكتىلەرى مەن جۇمىس ۇدەرىستەرىنە ارنايى تالداۋ جۇرگىزۋ بەلگىلەندى.
سىبايلاس جەمقورلىق ءۇشىن جاۋاپكەرشىلىكتى كۇشەيتۋدە قىلمىستىق كودەكسكە وزگەرىس ەنگىزۋدى ۇسىنۋى قوعام دەرتىمەن كۇرەستىڭ ناتيجەلى بولارىنا سەندىرە تۇسەدى. وسىعان دەيىن جەمقورلىققا بايلانىستى سوتتالعان ادامنىڭ كەسىمدى جازانى تولىق وتەپ شىعارىنا جۇرتتىڭ سەنىمى از ەدى. سوندىقتان دا سوتتالعان جەمقورلاردى مەرزىمىنەن بۇرىن شارتتى تۇردە بوساتۋدىڭ كۇشىن جويۋ ەڭ قۋاتتى پروفيلاكتيكالىق اسەرگە يە بولادى.
جەمقورلىق دەرەكتەرى تۋرالى حابارلاعان ادامداردى زاڭ جۇزىندە قورعايتىن جۇيە قالىپتاستىرۋ تۋرالى ۇسىنىسى دا وسىعان دەيىن ەسكەرىلمەي كەلگەن ماسەلەنىڭ ءبىرى.
2021 جىلدان باستاپ مەملەكەتتىك قىزمەتشىلەر, دەپۋتاتتار مەن سۋديالار ءۇشىن شەتەلدە بانك شوتتارىن يەلەنۋگە تىيىم سالۋدى ەنگىزۋ باستاماسى ەل مۇددەسى ءۇشىن قىزمەت ەتۋ يدەولوگياسى تۇرعىسىنان عانا ەمەس, جەمقورلىق كاپيتالىن شەتەلگە شىعارۋ مۇمكىندىكتەرىن جويۋ ماقساتىندا دا ماڭىزدى.
«قوعامدىق باقىلاۋ تۋرالى» زاڭنىڭ قابىلدانۋى ازاماتتار مەن ۇكىمەتتىك ەمەس ۇيىمداردى سىبايلاس جەمقورلىق پەن بيۋروكراتياعا قارسى جۇيەلى تۇردە ارەكەت ەتۋگە بارىنشا كەڭ اۋقىمدا تارتۋعا سەپ بولادى.
ارداق ەرسەيىتوۆ,
سىبايلاس جەمقورلىققا قارسى ءىس-قيمىل اگەنتتىگىنىڭ (سىبايلاس جەمقورلىققا قارسى قىزمەت) قىزىلوردا وبلىسى بويىنشا دەپارتامەنت باسشىسى