ماڭعىستاۋدا يتبالىقتاردى قورعايتىن جوبا قولعا الىندى

كاسپي تەڭىزىنىڭ بيوالۋان تۇرلىلىگىن ساقتاۋعا ارنالعان زەرتتەۋلەر مەن شارالار جۇرگىزۋدى كوزدەيتىن جوبا قولعا الىندى. جوبا اياسىندا 15-28 قىركۇيەك ارالىعىندا جاڭا, تەڭىز, پودگورنىي, رىباچي, قۇلالى ارالدارىنىڭ جاعالاۋىندا جانە ارالدار اراسىنداعى قايراڭدار ۋچاسكەسىندە, يتبالىق ارحيپەلاگى ارالدارىنىڭ ۇزىنا بويىنا تەكسەرۋ جۇرگىزىلەدى. سونداي-اق, قوقىس پەن تورلاردى جيناۋ بويىنشا جۇمىستار قولعا الىنباق.

سپيكەردىڭ سوزىنشە, كاسپي يتبالىعى بالىق اۋلاۋعا ارنالعان تورعا تۇسۋدەن ءولىپ جاتىر. وسى جوبا اياسىندا 2019 جىلدىڭ كۇزىندە تۇپقاراعان جارتىارالىنىڭ باتىس جاعالاۋىندا جۇرگىزىلگەن ءولى يتبالىقتاردىڭ دەنەسىن زەرتتەۋدىڭ ناتيجەلەرى ولاردىڭ ولىمىنە بالىق اۋلاۋ تورلارىنا ءتۇسۋى سەبەپ بولعانىن كورسەتتى.

بۇل ەكسپەديتسيا 2019 جىلدىڭ قىركۇيەك-قازان ايلارىندا ۇيىمداستىرىلىپ, 3 اپتاعا سوزىلدى.

"وسى ۋاقىت ارالىعىندا 500-گە جۋىق تور جانە 6 500 كگ وزگە دە قالدىقتار (ونىڭ ىشىندە شىنى, پلاستيك, تۇرمىستىق قالدىقتار) جيناپ الىندى. كاسپي تەڭىزىنىڭ جاعالاۋ بولىگىندەگى 94 كيلومەتر اۋماق تازارتىلدى. جاعالاۋدان تابىلعان تورلاردىڭ كوپشىلىگى مونوجىپتەن جانە ءىرى كوزدى توردان تۇراتىنىن اتاپ وتكەن ءجون. ناقتى وسىلار يتبالىق ءۇشىن وتە قاۋىپتى. سەبەبى جانۋارلار تورعا تەز ورالىپ, ولەدى نەمەسە توردىڭ ۇزىلگەن بولىگىنە ورالىپ, جارالانادى, كەيىن ءبارىبىر وسى جايت ولاردىڭ ولىمىنە اكەلىپ سوعادى. جاعالاۋدان سونىمەن قاتار كوپ مولشەردەگى قوقىس تابىلدى. تەكسەرۋ بارىسىندا ەنى 50-دەن 100 مەترگە دەيىنگى جولدىڭ ءار شاقىرىمىنان ورتا ەسەپپەن 120 كگ بولاتىن پلاستيك بوتەلكەلەر جانە وزگە دە قاتتى تۇرمىستىق قالدىقتار تابىلدى", دەيدى ت.بايمۇقانوۆ.

زەرتتەۋلەر پلاستيك ماتەريالدىڭ وتە ۇساق بولشەكتەرگە بولىنەتىنىن كورسەتتى. سپيكەردىڭ ايتۋىنشا, يتبالىقتار قورەكتەنۋ كەزىندە پلاستيك ماتەريالداردى جۇتۋى مۇمكىن. "سونىمەن قاتار ميكروپلاستيك جانۋارلاردىڭ اعزاسىنا تاعام تىزبەگى ارقىلى, ياعني ولار جەگەن بالىقتار مەن شايان تارىزدىلەر ارقىلى ەنەدى. كاسپي يتبالىعى تاعام تىزبەگىن تۇيىقتاۋشى بولعاندىقتان, ولاردىڭ اعزاسىندا پلاستيك بولشەكتەردىڭ بار-جوعىن زەرتتەۋ ماسەلەسى وتە وزەكتى بولىپ تۇر. جاعالاۋدا جانە يتبالىق ارالدارىنىڭ اكۆاتورياسىندا يەسىز تورلاردى جيناۋ كاسپي يتبالىعىنىڭ تىرشىلىك ەتۋ مەكەنىن ساقتاپ قالۋ ءۇشىن قاجەت. كاسپي تەڭىزىن قوقىستان تازارتۋ مەن توردان ارىلتۋدىڭ ماڭىزى وتە زور", دەيدى ول.