اقمولا وبلىسىنىڭ ديقاندارى ەگىن وراعىن اياقتادى

زەرەندى اۋدانىنىڭ ديقاندارى بيىل 277 مىڭ گەكتار القاپقا ءداندى داقىلدار تۇقىمىن سىڭىرگەن بولاتىن. بيىلعىداي قۋاڭشىلىق جىلى  توپىراعى قۇنارلى وڭىردە ءتاپ-ءتاۋىر ەگىن ءوستى. ۇزاق جىلعى باي تاجىريبەسى بار ديقاندار اگروتەحنيكالىق شارالاردى ۋاقىتىلى ءارى ءمىنسىز اتقارۋعا بار كۇش-جىگەرلەرىن جۇمىلدىرعان بولاتىن. اسىرەسە, كوكتەمگى ىلعال جابۋ جۇمىستارىنا ۇلكەن ءۇمىت ارتتى. سونىڭ ناتيجەسىندە كۇزگى بەرەكە كوڭىل توعايتارلىق. گەكتار بەرەكەسى 13,8 تسەنتنەردەن اينالۋدا. بۇل وبلىستاعى ءتاۋىر كورسەتكىشتەردىڭ ءبىرى. قازىر اۋدانداعى ەگىستىك القاپتارىنىڭ 74 پروتسەنتى ورىلدى. الداعى كۇندەر اشىق بولسا, از ۋاقىتتىڭ ىشىندە بار ءونىمدى جيناپ الماق.    

وبلىستا ەگىن وراعىن العاشقىلاردىڭ ءبىرى بولىپ اياقتاعان "ديقان پليۋس" سەرىكتەستىگى 23 مىڭ گەكتار القاپقا ءدان سىڭىرگەن بولاتىن. بۇگىنگى كۇنى ەڭبەكقور ۇجىم كۇزگى دالا جۇمىستارىن تولىق اياقتاپ, جەردەن ونگەندى جەردە قالدىرماي, بار استىقتى قۇت قامبالارىنا قۇيىپ الدى.

"قىرمانعا 26800 توننا بيداي جەتكىزىلدى. جاۋاپتى ناۋقان قىزىپ تۇرعان ۋاقىتتا ەكى بريگادا كۇنى-ءتۇنى تىنباي ەڭبەك ەتتى", – دەيدى قىرمان مەڭگەرۋشىسى ماكسيم گلۋشكوۆسكي, – قازىر استىقتى تازالاۋدامىز. بۇل ارادا كەلەر جىلدىڭ تۇقىمىنا دا ايرىقشا كوڭىل اۋدارىلىپ وتىرعاندىعىن ايتا كەتسەك ارتىق بولماس. قازىردىڭ وزىندە بەس مىڭ توننا تۇقىم دايىندالىپتى.

ءونىمدى ساقتاۋدا جاڭا تەحنولوگيالار پايدالانۋدا. سونىڭ ءبىرى استىق ساقتاۋ قاپشىعى. سىيىمدىلىعى 200 توننا بولاتىن قاپشىققا كەپتىرىلىپ سالىنعان ءداندى ءبىر جىلعا دەيىن ساقتاۋعا بولادى ەكەن. 

ءبىر ايتا كەتەرلىگى, شارۋاشىلىقتا جۇمىسشىلارعا جاقسى جاعداي جاسالعاندىعى. بار كۇش-جىگەرىن ەل ىرىزدىعىن شاشپاي-توكپەي جيناپ الۋعا جۇمىلدىرعان دالا ەرلەرىنىڭ اسحاناسىنداعى ءدام ءتىل ۇيىرەدى. سىرتتان كەلىپ ىستەيتىندەرگە ارنالعان جاتاقحانا دا جايلى. شارۋاشىلىق اۋىلدىق وكرۋگتەگى 168 ادامدى جۇمىسپەن قامتىپ وتىر. تۇراقتى جالاقىمەن بىرگە الەۋمەتتىك-تۇرمىستىق جاعدايلارى دا نازاردان تىس قالعان ەمەس.

"سەرىكتەستىكتىڭ سەپتىگى ءتيىپ تۇر", – دەيدى كۇسەپ اۋىلدىق وكرۋگىنىڭ اكىمى بەركىندى بەكبولاتوۆ, – قىستىڭ كۇنى جولىمىزدى تازالاپ بەرەدى. كارانتين كەزىندە دە قول ۇشىن سوزدى. 12 وتباسىنا 50 مىڭ تەڭگەدەن قارجىلاي كومەك كورسەتتى. الەۋمەتتىك جاعىنان از قامتىلعاندارعا ازىق-ت ۇلىك سەبەتىن دە تاراتىپ جاتىر.

ءوز شارۋاسىن تاپ-تۇيناقتاي ەتىپ تىندىرعان سەرىكتەستىك ەندى كورشىلەرىنە كومەكتەسۋدە. ولاردىڭ استىق كومبايندارى قازىر وزگە شارۋاشىلىقتاردىڭ ەگىنىن جيناپ جاتىر.   

اقمولا وبلىسى,

زەرەندى اۋدانى.