مەملەكەت باسشىسى قاسىم-جومارت توقاەۆ قازاقستان حالقىنا ارناعان جولداۋىندا: «مەملەكەت – ءتيىمسىز شارۋاگەر دەگەن قاعيدا اكسيوماعا اينالدى», دەگەن بولاتىن.
پرەزيدەنت باسەكەلەستىكتى قورعاۋ جانە دامىتۋ جونىندەگى اگەنتتىكتى قۇرۋعا شىن مانىندە وتكىر قاجەتتىلىكتى بايقاپ وتىرعانىن اڭعارتتى. ەكونوميكالىق زەرتتەۋلەر ينستيتۋتى باسەكەلەستىك ماسەلەلەرى بويىنشا ءوزىنىڭ زەرتتەۋلەرى مەن تالدامالىق جازبالارىندا مونوپولياعا قارسى ورگانعا ەلدىڭ ءبىرىنشى باسشىسىنا تىكەلەي باعىناتىن قۇقىق قورعاۋ ورگانى مارتەبەسىن بەرۋ تۋرالى ماسەلەنى بىرنەشە رەت كوتەردى.
باسەكەلەستىك دامىعان كوپتەگەن ەلدە مونوپولياعا قارسى ورگان تەرگەۋ جۇرگىزۋ كەزىندە ۇلكەن وكىلەتتىكتەرگە يە قۇقىق قورعاۋ ورگانى رەتىندە قۇرىلادى جانە جۇمىس ىستەيدى (مىسالى, «تاڭداعى رەيدتەر» جانە جاۋاپ الۋدى جۇرگىزەتىن ۇلىبريتانيانىڭ مونوپولياعا قارسى ورگاندارى (سما); ەۋروپالىق كوميسسيا جانىنداعى مونوپولياعا قارسى زاڭنامانىڭ بۇزىلۋىن تەرگەۋ جونىندەگى ارنايى توپ; كانادا (Competition Bureau Canada); اۋستراليا (Australian Competition and Consumer Commission) جانە ت.ب.).
بۇل رەتتە قازاقستانداعى باسەكەلەستىكتى قورعاۋ جانە دامىتۋ جونىندەگى اگەنتتىكتىڭ قىزمەتى اشىق ءارى ءتيىمدى بولۋى ءتيىس دەپ سانايمىن. ول ءۇشىن اگەنتتىك تەرگەۋدىڭ باستالۋى تۋرالى ءباسپاسوز حابارلامالارىن جاريالاۋى, ءوزىنىڭ ينتەرنەت-پورتالىندا جۇرگىزىلگەن تەرگەۋلەر جونىندە ەسەپتەردىڭ نۇسقالارىن اشىق جانە قولجەتىمدى ورنالاستىرۋى, سونداي-اق ساپالى تەرگەۋ جۇرگىزۋ ءۇشىن ەكونوميكالىق تالداۋ ادىستەرىن بەلسەندى پايدالانىپ, قوعامدىق تىڭداۋلاردى ۇنەمى وتكىزۋمەن بىرگە باسەكەلەستىك ماسەلەلەرى بويىنشا جەكە سوت (تريبۋنال) قۇرىلۋى قاجەت دەپ سانايمىن.
سول سەكىلدى ەل ەكونوميكاسىنا مەملەكەتتىڭ قاتىسۋىن ازايتۋ ءۇشىن «باسەكەلەستىك بەيتاراپتىق» قاعيداتىن ىلگەرىلەتۋى ءتيىس.
ەرلان كارىموۆ,
«ەكونوميكالىق زەرتتەۋلەر ينستيتۋتى» اق جەتەكشى ساراپشىسى