ەلورداداعى كوپىردىڭ استىنداعى الاڭدا زارينا دياس, ءالجان جارمۇحامەدوۆ, دجەيمس لەبرون جانە باسقا دا ايگىلى سپورتشىلاردىڭ گراففيتي-سۋرەتتەرى پايدا بولدى, دەپ حابارلايدى Egemen.kz قازاقپاراتقا سىلتەمە جاساپ.
ەلوردا اكىمدىگىنىڭ ءباسپاسوز قىزمەتىنىڭ مالىمەتىنشە, نۇر-سۇلتاندا تاعى ءبىر ارت-كەڭىستىكتى بەزەندىرۋ جۇمىستارى جۇرگىزىلىپ جاتىر. ول اۋماق ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جانىنداعى كوپىردىڭ استىنداعى الاڭ.
ول جەردە سكەيت-اۋماق, ۇستەل تەننيسىنە ارنالعان جەر مەن workout-اۋماق ورنالاستىرىلادى.
"بۇل يدەيا سپورتپەن اينالىسۋ ءۇشىن جايلى جاعداي جاساۋ نيەتىنەن تۋىپ وتىر. مۇنداعى ماقسات - بۇقارالىق سپورتتى دامىتۋ. جاستاردا باعىت-باعدار, الار ۇلگى بولۋى كەرەك. ولار ويناپ تا, شىنىعىپ ءجۇرىپ تە مىقتىلاردان ۇلگى الۋى كەرەك", دەپ حابارلايدى اكىمدىكتەن.
گراففيتي-سۋرەتتەردىڭ تانىستىرىلۋىنا قالا اكىمى التاي كولگىنوۆ قاتىستى.
"بۇل كەڭىستىكتە ازاماتتار سپورتپەن اينالىسادى ءارى سەرۋەندەي الادى. قازىر نىسانداردىڭ ءبارى جابىق بولعاندىقتان سپورتپەن اينالىسۋدىڭ ماڭىزى وتە زور. بيىل عانا 150 اۋلا اباتتاندىرىلدى. وسى باستاما جاستاردىڭ سپورتپەن اينالىسۋىنا مۇرىندىق بولارىنا سەنىمدىمىز", دەدى ول.