نۇر-سۇلتان قالاسىنداعى حان شاتىر ساۋدا -ويىن-ساۋىق ورتالىعى جانىنداعى الاڭدا جامبىلدىق اۋىل شارۋاشىلىق تاۋار وندىرۋشىلەرىنىڭ جارمەڭكەسى ءوتتى, دەپ حابارلايدى Egemen.kz قازاقپاراتقا سىلتەمە جاساپ.
شارۋالار ەلورداعا جالپى قۇنى 320 ميلليون تەڭگە بولاتىن 282,6 توننا ازىق-ت ۇلىك ونىمدەرىن اكەلدى. بۇل تۋرالى جامبىل وبلىسى اكىمىنىڭ ءباسپاسوز قىزمەتى حابارلادى. ەلوردا تۇرعىندارىنا ەت, ءسۇت جانە كونديتەرلىك ونىمدەر, بال, كوكونىستەر مەن جەمىستەر ۇسىنىلدى. جارمەڭكەگە نۇر-سۇلتان قالاسى مەن جامبىل وبلىسىنىڭ اكىمدەرى التاي كولگىنوۆ پەن بەردىبەك ساپارباەۆ ارنايى قاتىستى.
"مۇنداي جارمەڭكەلەر وڭىرارالىق ىنتىماقتاستىقتى نىعايتۋعا جانە ماڭىزدى تاۋارلاردىڭ باعاسىن تۇراقتاندىرۋعا وڭ اسەرىن تيگىزەدى. بۇل ەلوردالىقتاردىڭ باسىم بولىگىنىڭ نازارىن اۋدارتقانى قۋانتادى. مەملەكەت شارۋالارعا جان-جاقتى قولداۋ كورسەتۋدە. ءبىزدىڭ باستى ماقساتىمىز – يمپورتتى ازايتۋ جانە ءوز وبلىسىمىزدى عانا ەمەس, كورشى وڭىرلەردى دە وتاندىق ونىممەن قامتاماسىز ەتۋ", دەپ اتاپ ءوتتى بەردىبەك ساپارباەۆ.
جارمەڭكەدە جامبىل وبلىسىنىڭ 10 اۋدانى جانە تاراز قالاسىنان كەلگەن بارلىعى 90 اۋىل شارۋاشىلىعى تاۋار ءوندىرۋشىسى ءوز ونىمدەرىن ۇسىندى. وبلىس اكىمىنىڭ ورىنباسارى بەرىك نىعماشەۆ جىل سايىن مۇنداي جارمەڭكەنى وتكىزۋ بارىسىندا كولىك شىعىندارى مەن ساۋدا ورىندارىمەن قامتاماسىز ەتۋدى سالالىق باسقارما ءوز موينىنا الاتىندىعىن اتاپ ءوتتى.
تاۋارلاردى جەتكىزۋ ءۇشىن 10 اۋىر جۇك كولىگى بولىنگەن دەسەك, ونىڭ ىشىندە 4 توڭازىتقىشپەن قامتىلعان كولىك بار. ال, تاۋار وندىرۋشىلەر ءۇشىن ەكى اۆتوبۋس ۇيىمداستىرىلىپتى. شارۋالار باعانى نارىقتان 10-20 پايىز تومەن باعادا وتكەرۋگە ەش قارسىلىق بىلدىرمەي, كەلىسىم بەرگەن. تۇتىنۋشىلاردى ونىمدەردىڭ تەك باعاسى عانا ەمەس, ساپاسى دا قىزىقتىردى.
"بارلىق ونىمدەر سانيتارلىق-ۆەتەرينارلىق تالاپتارعا سايكەس كەلەدى جانە تاۋاردىڭ ساپاسى مەن شىعۋىنا قاتىستى سەرتيفيكاتتارعا يە. مۇنداي جارمەڭكەلەر ساتىپ الۋشىلارعا عانا ەمەس, ساتۋشىلارعا دا پايدالى. سەبەبى, ولار ءوز ونىمدەرىن دەلدالسىز تىكەلەي وتكەرۋگە مۇمكىندىك الادى", دەيدى بەرىك نىعماشەۆ.