ەلىمىزدە جولداردىڭ 88%-نىڭ قولدانۋ جاعدايى قاناعاتتانارلىق دەڭگەيدە. بۇل تۋرالى قازاۆتوجول ۇلتتىق كومپانياسىنىڭ باسقارما توراعاسى ۇلان ءالىپوۆ ءمالىم ەتتى, دەپ حابارلايدى Egemen.kz قازاقپاراتقا سىلتەمە جاساپ.
"ەلىمىزدە جالپى ۇزاقتىعى 24 مىڭ شاقىرىم جول بار, بۇگىندە سونىڭ 88%-نىڭ جاعدايى قاناعاتتانارلىق. جولداردىڭ ساپاسىنا كەلسەك, ونى تەكسەرەتىن 5 ساتىدان تۇراتىن ءوزىنىڭ ءتارتىبى بار. اتاپ ايتقاندا, مەردىگەر, اۆتور, تەحنيكالىق قاداعالاۋ, ساپا ورتالىعى جانە سوڭىندا تاپسىرىس بەرۋشىنىڭ ءوزى تەكسەرۋدەن وتكىزەدى. سونىمەن قاتار بۇرىن جول ساپاسىنىڭ كەپىلدىك مەرزىمى 2-3 جىل بولسا, ەندى ول 5 جىلعا دەيىن ۇزارتىلدى. ياعني جاڭادان سالىنعان جولدان 5 جىل كولەمىندە اقاۋ تابىلسا, وندا مەردىگەر كومپانيا ءوز قالتاسىنان قايتا جوندەيدى. ال 5 جىل بويى جولدى قايتا جوندەۋ كومپانياعا ءتيىمسىز, وسى ورايدا بۇل تالاپ جاۋاپكەرشىلىكتى ارتتىرادى دەگەن ۇمىتتەمىز", دەدى ۇلان ءالىپوۆ.
ونىڭ ايتۋىنشا, ەلىمىزدە جولدار جىلىنا 2 رەت تەكسەرۋدەن وتەدى.
"تەكسەرۋ بارىسىندا جولدان اقاۋ تابىلسا, ءبىز وندا جاۋاپتى مەردىگەر كومپانياعا حابارلاسىپ, كەمشىلىكتەردى تۇزەتۋعا ۋاقىت بەرەمىز. ەگەر بەلگىلەنگەن مەرزىمدە كەمشىلىك تۇزەتىلمەسە, ول كومپانيانىڭ بىزدەگى كەپىلدىك قارجىسى ۇستالادى. جالپى ەلىمىزدە رەسپۋبليكالىق ماڭىزى بار جولداردى سالاتىن جانە جوندەيتىن 20-عا جۋىق كومپانيا بار, ال وڭىرلەردىڭ ءوز كومپانيالارى بار. جولعا قاتىستى ايتىپ وتەتىن تاعى ءبىر ماسەلە, ءبىز تەك رەسپۋبليكالىق ماڭىزى بار جولدارعا جاۋاپتىمىز, ال وبلىس, اۋدان جانە اۋىل ارالىق جولدارعا جەرگىلىكتى بيلىك جاۋاپتى", دەدى ول.
سونداي-اق, ۇلتتىق كومپانيا باسشىسى جول سالۋدا شەتەلدىك تاجىريبەنى ەنگىزۋگە قاتىستى ءوز پىكىرىن ءبىلدىردى.
"ارينە, جول سالۋ مەن جوندەۋدە شەتەلدىك تاجىريبەگە سۇيەنەمىز. بىراق ونىڭ وزىندىك ەرەكشەلىكتەرى بار. سەبەبى ەۋروپاداعى جوعارى ساپالى جول ماتەريالدارى بىزگە جارامايدى, ويتكەنى ءبىزدىڭ ەلدىڭ كليماتى بولەك. سوندىقتان شەتەلدىك تاجىريبە ءبىزدىڭ ەلگە اكەلىنگەن جاعدايدىڭ وزىندە ونى ارنايى سىناقتان وتكىزىپ, ساراپتاما جاساپ ءوزىمىزدىڭ اۋا رايىنا ىڭعايلاپ قولدانامىز", دەيدى اتالعان ۇيىمنىڭ باسقارما توراعاسى.