اقپارات جانە قوعامدىق دامۋ ءمينيسترى ايدا بالاەۆا "قوعامدىق باقىلاۋ" تۋرالى زاڭ جوباسىن ازىرلەيتىن جۇمىس توبىنىڭ قۇرامىنا پرەزيدەنتتىك جاستار كادرلىق رەزەرۆىنەن ىرىكتەلىپ شىققان جاستاردى شاقىردى, دەپ حابارلايدى Egemen.kz
ايتا كەتسەك بۇعان دەيىن ايدا بالاەۆا قوعامدىق باقىلاۋ فۋنكتسياسىنا يە ۇيىمداردىڭ ءتىزىمىن كەڭەيتۋ كەرەكتىگىن ايتتى. ونىڭ ايتۋىنشا پاندەميا كەزىندە 300-گە تارتا بەلسەندى ازامات ءدارى-دارمەك باعاسىنىڭ تۇراقتىلىعى, گۋمانيتارلىق كومەكتى ءبولۋ, مەديتسينالىق ۇيىمداردىڭ جۇمىسىنا قوعامدىق باقىلاۋ جۇرگىزۋ جۇمىستارىن اتقارعان.
"قازىر قوعامدىق باقىلاۋشىلار شاعىن جانە ورتا بيزنەس سۋبەكتىلەرىندە, حالىق كوپ جينالاتىن ورىنداردا, ساۋدا ورتالىقتارىندا قاداعالاۋ جۇمىستارىن جۇرگىزىپ, ماسكا مەن الەۋمەتتىك قاشىقتىق رەجيمىنىڭ ساقتالۋىن باقىلاۋدا. قاي جەردە زاڭسىز تويلاردىڭ ءوتىپ جاتقانىن دا انىقتاپ جاتىر. سول سەبەپتى وسى ماسەلەلەردىڭ ءبارى دە قوعامدىق باقىلاۋ تۋرالى جەكە زاڭنىڭ بولۋى كەرەكتىگىن ايقىنداي تۇسەدى. ول تۋرالى پرەزيدەنت جولداۋىندا ايتقان ەدى. ءبىز بۇگىنگى كۇنى جۇمىس توبىن قۇردىق. ول اتالمىش زاڭنىڭ كونتسەپتسياسىن دايىندايدى", دەدى ايدا بالاەۆا پرەزيدەنتتىك كادرلىق رەزەرۆتەگى جاستارمەن كەزدەسۋ بارىسىندا.
ءمينيستردىڭ ايتۋىنشا ول جۇمىس توبىنا ۇكىمەتتىك ەمەس ۇيىمداردىڭ وكىلدەرى, حالىقارالىق جانە قازاقستاندىق ساراپشىلار, ۇلتتىق كەڭەس مۇشەلەرى ەنەدى. ايدا بالاەۆا وسى جۇمىس توبىنا اتالمىش جيىندا پرەزيدەنتتىك جاستار كادرلىق رەزەرۆىنەن ىرىكتەلگەن ازاماتتاردى دا شاقىردى.
"زاڭ جوباسىنىڭ نەگىزگى نوۆەللالارى قوعامدىق دامۋ ينستيتۋتتارىن جەتىلدىرۋگە باعىتتالعان. سونىمەن قاتار بۇل زاڭ مەملەكەتتىك ورگاندار مەن كۆازيمەملەكەتتىك ورگانداردىڭ اشىقتىعى مەن ەسەپتىلىگىن قامتاماسىز ەتەدى", دەدى ول.