تۇركىستان وبلىسى جەتىساي اۋدانىندا بيىل 5 جاڭا مەكتەپ پايدالانۋعا بەرىلەدى دەپ جوسپارلانعان. ال, كەلەر جىلى 200 جانە 300 ورىندىق ەكى مەكتەپتىڭ قۇرىلىسى اياقتالماق, دەپ حابارلايدى Egemen.kz قازاقپاراتقا سىلتەمە جاساپ.
اۋدان اكىمدىگىنىڭ مالىمەتىنشە, جاڭا ءبىلىم ۇيالارىنىڭ قاتارىندا ەراليەۆ اۋىل وكرۋگىنە قاراستى اراي اۋىلىنداعى 300 ورىندىق ء"داۋىر" مەكتەبى بار.
ال وتان اۋىلىندا 300 ورىندىق №47 مەكتەپ سالىنۋدا. سونداي-اق, جەتىساي قالاسىندا 1200 ورىندىق جانە جىلىسۋ اۋىل وكرۋگىنە قاراستى باققونىس اۋىلىندا 300 ورىنعا شاقتالعان مەكتەپتەر تاپسىرىلادى.
بۇدان وزگە اتامەكەن اۋىلدىق وكرۋگىندە 300 ورىنعا ارنالعان مەكتەپ پايدالانۋعا بەرىلمەك. وسىلايشا اۋداندا جالپى سانى 2400 بالاعا لايىقتالعان ءبىلىم ۇيالارى وقۋشىلارعا ەسىگىن ايقارا اشپاق.
ايتا كەتەيىك, اراي اۋىلىنداعى 300 ورىندىق مەكتەپتىڭ قۇرىلىسى 2018 جىلى باستالعان. بيىل قىركۇيەك ايىندا تولىق اياقتالادى دەپ كۇتىلۋدە.
قازىر بۇل مەكتەپتىڭ ىشىنە جيھاز جەتكىزىلىپ, تەحنيكامەن جابدىقتاۋ جۇمىستارى جۇرگىزىلۋدە. ەسكە سالايىق, جەتىساي اۋدانىندا بيىل وقۋشىلاردىڭ سانى 44 مىڭنان اسقان.