شىمكەنتتە كۇزگى اسكەرگە شاقىرۋ قىزۋ ءجۇرىپ جاتىر. ءبىرىنشى قىركۇيەكتەن باستاپ 18 جاسقا تولعان ازاماتتار قالالىق قورعانىس ىستەرى جونىندەگى دەپارتامەنتiندە مەديتسينالىق كوميسسيادان, تەست جانە سۇحباتتاسۋ كەزەڭىنەن وتۋدە. بيىلعى جىلدىڭ كۇزىندە شىمكەنتتەن 700-گە جۋىق جاستى شاقىرۋ جوسپارلانعان, دەپ حابارلايدى Egemen.kz.
11 قىركۇيەكتە جاس تولىقتىمنىڭ ءبىرىنشى توبى وزدەرىنىڭ كونستيتۋتسيالىق بورىشىن ورىنداۋعا اتتانادى. قازىر ولار شاقىرۋ كوميسسياسىنىڭ وتىرىسىنان ءوتىپ جاتىر. وندا شاقىرۋ كوميسسياسى توراعاسى جانە مەديتسينالىق كوميسسيا توراعاسىنىڭ قاتىسۋىمەن كانديداتتى قايتا تەكسەرۋ جۇرگىزىلەدى. ونىڭ قىزمەتكە بارۋ ماقساتى مەن پسيحولوگيالىق كوزقاراسى تەكسەرىلەدى.
دارىگەرلەردىڭ ايتۋىنشا, اسكەرگە شاقىرىلۋشىلاردىڭ كوپشىلىگى اسكەري قىزمەت وتكەرۋگە جارامدى. تەك ءبىر كۇندە جۇزدەن استام جاستار مەديتسينالىق تەكسەرۋدەن وتەدى.
شىمكەنتتىڭ جەرگىلىكتى اسكەري باسقارۋ ورگاندارىنىڭ حابارلاۋىنشا, ەلىمىزدىڭ ءۇشىنشى مەگاپوليسىنىڭ جاستارى اسكەري قىزمەتكە بەلسەندى قىزىعۋشىلىق تانىتۋدا, سونىڭ ارقاسىندا ايتارلىقتاي باسەكەلەستىك تۋىندايدى, تەك ۇزدىكتەر عانا اسكەرگە بارا الادى.
شاقىرىلۋشىلار مەن لاۋازىمدى ادامدار اراسىندا كوروناۆيرۋستىق ينفەكتسيانىڭ تارالۋىنىڭ الدىن الۋ ماقساتىندا پروفيلاكتيكالىق شارالاردى كۇشەيتۋ ءۇشىن قۇراما پۋنكتتەردە مەديتسينالىق بەكەتتەر ورنالاستىرىلدى. وبلىستىق مەديتسينالىق كوميسسيالاردىڭ قۇرامىنا ينفەكتسيونيست-دارىگەرلەر ەنگىزىلدى.
جاس بۋىنمەن اسكەري بولىمدەرگە كەتەر الدىندا مىندەتتى تۇردە پتسر-زەرتتەۋلەر ادىسىمەن COVID-19-عا زەرتحانالىق زەرتتەۋ جۇرگىزىلەدى. ال بولىمگە كەلگەننەن كەيىن جاستاردى ەكى اپتالىق كارانتينگە وقشاۋلايدى. كارانتين كەزىندە مەديتسينالىق تەكسەرۋ جانە الەۋمەتتىك-پسيحولوگيالىق زەرتتەۋ جۇرگىزىلەدى.
سونداي-اق, كەيىنگە قالدىرۋعا قۇقىعى بار اسكەرگە شاقىرىلۋشىلار ساناتىن كەڭەيتۋ ماڭىزدى جاڭالىق بولىپ تابىلادى. ەندى كەيىنگە قالدىرۋ قوسىمشا بەرىلەدى: پەداگوگتارعا, ولاردىڭ بۇكىل جۇمىس كەزەڭىندە, سونداي-اق قۇقىق قورعاۋ ورگاندارىنىڭ ءبىلىم بەرۋ مەكەمەلەرىندە وقىپ جاتقان ادامدارعا.