مەملەكەت باسشىسى قاسىم-جومارت كەمەل ۇلى توقاەۆتىڭ حالىققا جولداۋىن وقىعاندا قالام ۇشىنا ورالعان وسى ويمەن ساباقتاسا كوز الدىمىزعا بۇگىنى بەكەم ەلىمىزدىڭ كەلەشەگى كەلەدى.
ءبىز بۇل جولداۋدى تاعاتسىزدانا كۇتتىك. سەبەبى ءبىرىنشى كەزەكتە قازىرگى كۇرمەۋى قاتتى كۇردەلى كەزەڭنەن قالاي وتەتىنىمىزگە ايقىن جوسپار كەرەك ەدى. سول جوسپاردى, ەڭ الدىمەن قانداي ناقتى مىندەتتەردى جۇزەگە اسىرۋ قاجەتتىگىن انىقتاپ الۋ ماڭىزدى دەسەك, پرەزيدەنتتىڭ بيىلعى جولداۋى سوعان جاۋاپ بەرگەن باعدارشام بولدى. بۇل جولداۋ – اداستىرماس اق جۇلدىز, ەلدىڭ باق جۇلدىزى.
بيىلعى جولداۋدا كەزەك كۇتتىرمەيتىن وزەكتى ماسەلەلەر بىلگىرلىكپەن بايىپتى باياندالعان.
مەملەكەت الىپ بايتەرەك دەپ بەينەلەيتىن بولساق, اۋىل – ونىڭ تەرەڭگە تارتقان تامىرى. تامىر سۋالسا, بايتەرەك قۋرايدى, قۇلاپ تا قالادى. سول اۋىل-انانى قۇلاتپايتىن قاسيەتتى قاينار – اۋىل شارۋاشىلىعى. بۇل تۋرالى جولداۋدا:
«اۋىل شارۋاشىلىعىن دامىتپاي, باسەكەگە قابىلەتتى ەكونوميكا قۇرۋ مۇمكىن ەمەس.
بۇل سالادا شەشىمىن تاپپاي كەلە جاتقان وزەكتى ماسەلەلەر بار. اتاپ ايتقاندا, جۇرتتىڭ جەرگە قول جەتكىزە الماۋى, ۇزاق مەرزىمگە بەرىلەتىن «ارزان نەسيەنىڭ» بولماۋى, كاسىبي مامانداردىڭ تاپشىلىعى.
ونىمدىلىكتى ارتتىرىپ, شيكىزات وندىرۋمەن عانا شەكتەلمەۋ ءۇشىن, سونداي-اق قويما جانە كولىك ينفراقۇرىلىمىن دامىتۋ ماقساتىندا شۇعىل شارالار قابىلداۋ كەرەك.
ەلىمىزدە ەت, جەمىس-جيدەك, كوكونىس, قانت, بيداي, مايلى داقىلدار, ءسۇت ونىمدەرىن ءوندىرۋ جانە وڭدەۋ ءۇشىن 7 ءىرى ەكوجۇيە قالىپتاستىرۋعا بولادى. بالىق شارۋاشىلىعىنا دا ەرەكشە ءمان بەرگەن ءجون.
قوسىمشا قۇن قالىپتاستىرۋدىڭ وزەگى سانالاتىن ءىرى جوبالار ماڭىزدى ءرول اتقارۋعا ءتيىس.
ۆەرتيكالدى كووپەراتسيا اياسىندا جەكە قوسالقى شارۋاشىلىقتىڭ الەۋەتىن پايدالانعان ابزال.
جەكە شارۋاشىلىق ميلليونداعان اۋىل تۇرعىندارىنا تابىس تابۋعا مۇمكىندىك بەرە الادى. ولاردى وڭىرلىك ازىق-ت ۇلىك حابتارىن قۇرۋعا جۇمىلدىرۋ كەرەك», دەپتى مەملەكەت باسشىسى. قورعاسىن قۇيىلىپ الشى تۇسەر اسىقتاي كوكەيگە قونا كەتتى بۇل ءسوز.
بيىلعى جولداۋدىڭ ماڭىزدىلىعى سونشا ونىڭ ءار ءبولىمى, ءار تارماعى عانا ەمەس, ءار سويلەمى تۇنىپ تۇرعان ورالىمدى وي, ەل قامىن جەگەن ەردىڭ ەستەن كەتپەس ءسوزى!
مەملەكەت باسشىسى قاسىم-جومارت كەمەل ۇلى توقاەۆتىڭ حالىققا جولداۋداعى التىننان قىمبات اسىل سوزدەر جۇرەكتەن شىعىپ, جۇرەكتەرگە جەتتى. ماقسات ايقىن, مىندەت كوپ. ەندى جولداۋدا العا قويعان ماقساتقا جەتۋ ءۇشىن تەر توگۋ كەرەك. مۇزافار الىمباەۆتىڭ سوزىمەن ايتسام:
مەن بىلەمىن نە تابۋدى,
نە ىزدەپ,
ەڭبەك قانا ەلدىڭ ۇلى دەگىزبەك.
مەملەكەت باسشىسىنىڭ:
«قازاق زيالىلارىنىڭ جاڭا كەزەڭدەگى مىندەتى – ۇلت بولمىسىنىڭ جاڭا قاعيداتتارىن ورنىقتىرۋ. سونداي-اق ۇلت ساپاسىن ارتتىرۋعا اتسالىسۋ.
جاڭعىرعان قوعام جات ادەتتەردەن بىرتىندەپ ارىلۋى كەرەك.
ىسىراپشىلدىق پەن داڭعازالىق قوعامنىڭ دا, ادامنىڭ دا ابىرويىن توگەدى. جاۋاپسىزدىق, نەمقۇرايدىلىق بۇكىل ەلدى قاسىرەتكە ۇشىراتادى. ال بوس سوزدىلىك پەن بوسپەلىك, ماقتانشاقتىق قوعامنىڭ دامۋىن تەجەيدى. بۇل تۋرالى ۇلى اباي «وڭكەي جالعان ماقتانمەن, شىننىڭ بەتىن بويايدى» دەپ اشىق ايتقان. بۇل ماسەلە بۇگىنگى كۇنى دە وزەكتى بولىپ وتىر», دەگەن اسا سالماقتى, اسقان ساليقالى ءسوزى جادىمىزدا جاقسى جىرداي جاتتالىپ قالدى.
ءسابيت دوسانوۆ,
جازۋشى, مەملەكەتتىك سىيلىقتىڭ لاۋرەاتى