ەلباسى "استانا باس جوسپارى" عىلىمي-زەرتتەۋ جوبالىق ينستيتۋتىنا باردى

نۇر-سۇلتان قالاسىنىڭ اكىمى التاي كولگىنوۆ قازاقستاننىڭ تۇڭعىش پرەزيدەنتىنە قالانىڭ الەۋمەتتىك-مادەني نىساندارىنىڭ قۇرىلىسى, ينفراقۇرىلىمدى جاڭعىرتۋ, اباتتاندىرۋ جانە ءومىر سۇرۋگە قولايلى جاعداي جاساۋ سالاسىنداعى مىندەتتەردى كەزەڭ-كەزەڭىمەن جۇزەگە اسىرۋ جوسپارىن ۇسىندى.

نۇرسۇلتان نازارباەۆ جاڭا قازاقستاننىڭ نىشانىنا اينالعان ەلوردانىڭ دامۋىنا ءاردايىم ەرەكشە ءمان بەرەتىندىگىن اتاپ ءوتتى.

"جيىرما ەكى جىلدىڭ ىشىندە ەلوردا اكىمشىلىك, ىسكەرلىك, ەكونوميكالىق, مادەني جانە ساياسي ورتالىققا اينالدى. باستاپقى باس جوسپارلاردا قالا تۇرعىندارىنىڭ سانىن 1 ميلليون 200 مىڭ ادامعا جەتكىزۋ 2030 جىلعا قاراي كوزدەلگەن ەدى. بۇل كورسەتكىشكە 10 جىل بۇرىن ەرتە جەتتىك. 1997 جىلمەن سالىستىرعاندا قالا حالقىنىڭ سانى ءتورت ەسە ءوستى", – دەدى ەلباسى.

سونداي-اق نۇرسۇلتان نازارباەۆ ەلوردانىڭ ەكونوميكالىق دامۋىن اتاپ ءوتتى.

"جالپى, 22 جىلدىڭ ىشىندە جاڭا استانانىڭ دامۋىنا مەملەكەتتەن بولىنگەن ءاربىر 1 تەڭگە رەسپۋبليكالىق بيۋدجەتكە 2,8 تەڭگە بولىپ قايتارىلدى. بەس جىلدان بەرى باس قالا رەسپۋبليكالىق بيۋدجەت دونورى ايماقتارىنىڭ قاتارىندا", – دەدى ەلباسى.

سونىمەن بىرگە شاعىن جانە ورتا بيزنەس, قۇرىلىس سالاسى ەلوردانىڭ دامۋ درايۆەرىنە اينالعانى اتاپ ءوتىلدى.

"قالا ەكونوميكاسىنىڭ 55 پايىزىن شاعىن جانە ورتا بيزنەس قۇرايدى. جىل سايىن 20 مىڭنان استام جاڭا جۇمىس ورنى قۇرىلادى, ونىڭ 70 پايىزى شاعىن جانە ورتا بيزنەسكە تيەسلى. سونىمەن قاتار ەلوردا قۇرىلىس سەكتورىنىڭ كوشباسشىسى. 1997 جىلدان بەرى 26 ميلليون شارشى مەتردەن استام تۇرعىن ءۇي پايدالانۋعا بەرىلدى", – دەدى قازاقستاننىڭ تۇڭعىش پرەزيدەنتى.

وسى جىلداردىڭ ىشىندە ەلوردا ءبىلىم بەرۋ حابىنا, مادەني ورتالىققا جانە مەديتسينا كلاستەرى دامىعان قالاعا, سونداي-اق قازاقستاننىڭ بارلىق وڭىرلەرىن بىرىكتىرۋ ارقىلى ماڭىزدى كولىك جانە ترانزيتتىك حابقا اينالدى.

نۇرسۇلتان نازارباەۆ ەلوردانىڭ دامۋ جولىندا جەتىستىكتەرمەن قاتار, ازاماتتاردى تولعاندىراتىن ماسەلەلەر دە بار ەكەنىن اتاپ ءوتتى. ولاردىڭ ىشىندە – ۇلەسكەرلەرى بار قۇرىلىسى اياقتالماعان تۇرعىن ۇيلەر; ءۇش اۋىسىمداعى جانە وقۋشىلار سانى كوپ مەكتەپتەر; جاۋىن سۋ اعاتىن كارىز جۇيەسى; قوعامدىق قاۋىپسىزدىك ماسەلەلەرى جانە تاعى باسقالارى.

"ەلوردا اكىمدىگى ماسەلەلەردى ۇنەمى باقىلاۋدا ۇستاپ, ازاماتتاردىڭ وتىنىشىنە جەدەل جاۋاپ بەرۋى كەرەك", – دەدى قازاقستاننىڭ تۇڭعىش پرەزيدەنتى.

سونىمەن قاتار ەلباسى ەلوردا باسشىلىعىنىڭ الدىندا ۇكىمەتپەن بىرگە تۇرعىندار مەن قوناقتاردىڭ جايلى ءومىر ءسۇرۋى ءۇشىن قالانىڭ ينفراقۇرىلىمىن جاقسارتۋ بويىنشا باس جوسپار مەن دامۋ جوسپارىن جۇزەگە اسىرۋ مىندەتى تۇرعانىن اتاپ ءوتتى.

"جالپى, مەن ستراتەگيالىق مىندەتتەردى شەشۋدى قامتيتىن دامۋ جوسپارىن قابىلدايمىن. ەلوردا ءومىر سۇرۋگە جانە ىسكەرلىك بەلسەندىلىككە قولايلى قالا رەتىندە دامي بەرۋى كەرە", – دەدى نۇرسۇلتان نازارباەۆ.

سوڭىندا پرەمەر-ءمينيستردىڭ ورىنباسارى ەرالى توعجانوۆ قازاقستاننىڭ تۇڭعىش پرەزيدەنتىنە تۇركىستان قالاسىندا سالىنىپ جاتقان قازاق حاندىعىنىڭ تاريحىنا ارنالعان مەموريال جوباسىمەن تانىستىردى.