ىندەت ىندەي ءتۇستى

Iran Press جازعانداي, ەل پرەمەر-ءمي­نيسترى مۇستافا ءال كادحيمي: «قۇرعاقتاعى شەكارا جەرگىلىكتى نارىقتىڭ قاجەتتىلىگىن وتەۋ ءۇشىن ساۋدا جۇرگىزۋ ماقساتىندا عانا اشىلادى, ال وتەلدەر مەن مەيرامحانالار ۆيرۋستان ساقتانۋ شارالارىن قاتاڭ ۇستانۋى ءتيىس», دەي كەلە, 12 قىركۇيەكتەن باستاپ سپورتتىق جارىستار وتكىزۋگە دە بولاتىنىنا توقتالدى. دەگەنمەن جارىستاردىڭ بارلىعى جانكۇيەرلەرسىز وتكىزىلەدى. ال مەملەكەتتىك ورگاندار ءوز قىزمەتكەرلەرىنىڭ 50 پايىزىنىڭ كەڭسەگە كەلىپ جۇمىس ىستەۋىنە مۇمكىندىك بەرمەك.

* * *

فرانتسيانىڭ دەنساۋلىق ساقتاۋ ءمي­نيسترى وليۆە ۆەران 8 قىركۇيەكتە وسى اپتادان باس­تاپ COVID-19-عا قارسى انتي­دەنەنى جىلدام انىقتايتىن تەست ەنگىزى­لەتىنىن جاريالادى, دەيدى Le Figaro.

«تەست بار بولعانى 15-20 مينۋت ارا­لى­عىندا انتيدەنە تۇزىلگەنىن نەمەسە تۇزىل­مەگەنىن انىقتاپ بەرەدى. بۇل وسى سارسەنبىدەن جۇرگىزىلە باستايدى», دەگەن وليۆە ۆەران ازىرگە ەكسپەريمەنت تۇرىندە قولعا الىنعان تاجىريبەگە ۇلكەن ءۇمىت ارتىلىپ وتىرعانىن, ناتيجەسىنە قاراي ونى ءارى قاراي جالپىلاما ەنگىزۋ جونىندە شەشىم قابىلداناتىنىن ايتتى.

پاندەميانىڭ قاي ەلگە دە وڭاي سوقپاي تۇر­عانى ءمالىم. ودان فرانتسۋزدار دا زارداپ شە­گىپ وتىر. ەلدىڭ ۇلتتىق ستاتيستيكا جانە ەكونو­مي­كالىق زەرتتەۋلەر ينستيتۋتىنىڭ بولجامدا­رىنا قاراعاندا, 2020 جىلدىڭ سوڭىندا فران­تسۋزداردىڭ جۇ­مىسسىزدىق كورسەتكىشى 9,5 پايىزعا جوعا­رىلاۋى مۇمكىن.

اۋرۋمەن كۇرەستە قانداي دا ءبىر قارەكەت­تەردىڭ وڭ ناتيجەسىنە ءۇمىت ارتىپ, جەدەل تەست ەنگىزۋدى كوزدەگەن فرانتسيا ۇكىمەتى ەكونوميكانى قالىپقا كەلتىرۋدە شىعىس مولشەرى 100 ملرد ەۋرو كولەمىن قۇرايتىن باعدارلاما دا ازىرلەگەن كورىنەدى.

* * *

پولشا ءبىلىم بەرۋ جۇيەسى تولىقتاي قاشىقتان وقىتۋعا كوشۋدى قولايلى كو­رەدى, دەيدى اتالعان ەلدىڭ ءبىلىم ءمي­نيسترىنىڭ ورىنباسارى مارجەنا ماحالەك.

بۇگىندە 53 ءبىلىم بەرۋ ورنى وسى ادىس­پەن جۇمىس ىستەپ جاتىر. مارجەنا ماحا­لەكتىڭ ايتۋىنشا, قاشىقتان وقىتۋ مەن سا­باقتاردى ازايتۋدا اسا ىجداھاتتىلىق قاجەت. پولشاداعى بالاباقشالار مەن مەك­تەپتەردى جانە ارنايى وقۋ ورىندارىن قوس­قاندا ولاردىڭ سانى 48,5 مىڭ بولسا, سو­نىڭ 53-ءى تولىق, ال 29-ى ءىشىنارا قاشىقتان ءبىلىم بەرۋدە. الايدا ەلدەگى ەپيدەميالىق جاعدايدى ەسكەرە كەلە, اۋرۋدىڭ تارالماۋى ءۇشىن قاشىقتان جۇمىستى جالعاستىرۋدىڭ تيىمدىلىگى جوعارى دەگەن ويدامىز, دەدى ول. بۇل جايلى Polskie radio 24 ەفيرىندە ايتىلدى.

* * *

بيىل مامىر ايىندا كورەي ەكونوميكا ينستيتۋتىنىڭ ساراپشىلارى ەل ەكونو­ميكاسىنىڭ ءوسىمى 0,2% كولەمىندە بولادى دەپ ەسەپتەسە, ەندى ءىجو 1,1 پايىزعا تومەندەيدى دەپ وتىر.

COVID-19 ەكونوميكاعا تۇساۋ سالعانى­مەن قوسا, ونى ارتقا تارتىپ وتىر دەگەن ساراپشىلار قىتاي مەن اقش اراسىنداعى تايتالاستىڭ دا ەل قۋاتىن ارتتىرۋعا كەدەرگى جاساعانىنا توقتالعان.

بيىل جەكە سەكتورداعى تۇتىنۋ 4,6 پا­يىزعا تومەندەدى, الايدا وندىرىستىك قۋات­تىلىقتى ارتتىرۋعا سالعان ينۆەستيتسيا 4,2 پايىزدى قۇراپ, قۇرىلىس سالاسىنا ارنالعان قارجى 1,1 پايىز كولەمىنە دەيىن ارتتى. سوعان قاراماستان ەكونوميكا ۆيرۋس سالماعىن ايقىن سەزىنۋدە دەيدى ساراپشىلار.

* * *

دجونس حوپكينس ۋنيۆەرسيتەتى تاۋلىك ىشىندە رەكوردتى اۋرۋ كورسەتكىشى تىر­كەلۋىن جاريالادى.

بۇعان دەيىن 14 تامىزدا 304 351 ادامنىڭ جۇقتىرعانى ەڭ جوعارى سان بولىپ كەلگەن-ءدى, ەندى ودان دا ارتىق كورسەتكىش تىركەلدى.

پاندەميا قۇرساۋىنداعى مەملەكەتتەر ءتىزىمىنىڭ باسىندا بۇرىنعىداي اقش – 6,2 ملن, ەكىنشى ورىندا برازيليا – 4,1 ملن, ال ۇشتىكتە 4 ملن ادام جۇقتىرۋىمەن ءۇندىستان بەلگىلەنسە, تورتىنشىدە 1 ملن اداممەن رەسەي فەدەراتسياسى تۇر.

اقش كۆي-دەن ءولىم سانى جونىنەن دە (188 مىڭ) العاشقى ورىندا, ودان كەيىن برازيليا – 125 مىڭ, ءۇشىنشى ساتىدا 69 مىڭ ازاماتىنان ايرىلعان ءۇندىستان تۇر. وسىلايشا, جەر شارىندا SARS-CoV-2-تان اجال قۇشقاندار 876 مىڭ ادامنان

* * *

ەۋروپادا كەيبىر مەملەكەتتەر COVID-19-بەن كۇرەسۋدە الەۋمەتتىك قاشىقتىقتى ساقتاۋعا مۇمكىندىك بەرمەيتىن ورىنداردى جابا باستادى. بۇل جايىندا بىرقاتار باسىلىم جاريالادى.

ماسەلەن, «يزۆەستيا» مەن ربك اۋرۋدىڭ تارالۋى جاستار اراسىندا ازايماي تۇر­عانى الاڭداتقان سوڭ وسىنداي شارالار قابىلدانىپ جاتقانىن, يتاليادا ءتىپتى دالاداعى اشىق الاڭداردا بيلەۋگە تىيىم سالىنعانىن, مالتادا 15 ادامنان ارتىق ەش جەرگە جينالۋعا بولمايتىنىن جازسا, ددۇ دەرەكتەرىندە 15 پەن 24 جاس ارالىعىنداعى جاس­تار اراسىندا اۋرۋدىڭ 4,5 پايىزدان 15 پايىزعا دەيىن وسكەنى مىسالعا كەلتىرىلگەن. مالتادا تۇنگى كلۋبتار, بارلار تولىق جا­بىلعان. ال انتالياداعى دەمالىس ورىندارىندا كوڭىلدى «كوبىكتى كەشتەر» بيىل وتپەي جاتىر. گەرمانيا ديسكوتەكالاردى پاندەميا باستالعالى تىيىپ, جىلدا كۇزدە كەلندە 3 اي بويىنا جۇرەتىن ءداستۇرلى كارناۆالدى دا توقتاتتى.

شىلدە ايىندا ددۇ ايماقتىق ديرەكتورى حانس كليۋگەنىڭ ەۋروپا جاستارىن اۋرۋ تاراتۋشىلار دەپ ايىپتاعانى دا ەستە بولار.

* * *

مەكسيكا دەنساۋلىق ساقتاۋ مي­نيس­تر­لى­گىنىڭ دەپارتامەنت باسشىسى ريكاردو كور­تەس الكالا 24 ساعاتتىڭ ىشىندە 6 مىڭ­­­نان استام اۋرۋ جۇقتىرۋ تىركەلگەنىن حا­بار­لادى.

الكالانىڭ ايتۋىنشا, مەكسيكادا 629 409 ادام COVID-19 تىرناعىنا ءىلىنىپ, ونىڭ 67 326-سى ومىرىمەن قوشتاستى. ۆيرۋستىڭ مەكسيكالىقتاردى بوساتپاي تۇرعانىنا قا­را­ماستان, ەلدە 438 754 پاتسيەنتتىڭ اۋرۋدان جازىلىپ شىعۋى حالىقتىڭ سەنىمىن ارتتىرعانداي.

برازيليا جۇرتى ءبىر تاۋلىكتە 682 ازاماتىن جوعالتتى. دەنساۋلىق ساقتاۋ مينيسترلىگىنىڭ ءباسپاسوز قىزمەتى تاراتقان حابارلاما بويىنشا قايتىس بولعان برازيليالىقتار سانى 126 203 ادامعا جەتتى. 4 ملن 123 مىڭ ادام SARS-CoV-2 جۇقتىرىپ, ىندەتتەن كوز اشا الماي جاتقان ەلدە سوڭعى تاۋلىكتە 30 168 تۇر­عىننان اۋرۋ انىقتالىپتى. جالپى COVID-19 برازيلياعا اۋىر سوققى بولدى. الەم بويىنشا كۆي-مەن ەڭ ۇزاق, ياعني 152 كۇن اۋىرعان ايەلدىڭ دە وسى ەلدىڭ ازاماتى ەكەنى بەلگىلى.

* * *

كولۋمبيادا ءبىر كۇندە 8394 ادامنان ۆيرۋس تابىلدى.

پاندەميا پلانەتانى شارلاعالى بۇل ەلدە 658 456 ادام ۆيرۋس جۇقتىرىپ, 21 156 پاتسيەنت ومىردەن وتكەن ەدى.

5 قىركۇيەكتە 268 كولۋمبيالىق جوعارى­داعى ىندەت قۇرباندارىنىڭ قاتارىنا قو­سىلىپتى. ال ىندەتتى جەڭىپ شىققاندار سانى 507 مىڭ ادامدى قۇراعان كورىنەدى.