«اپات ايتىپ كەلمەيدى», بۇعان كەشەگى جەر-جاھاندى تارىنىڭ قاۋىزىنا سىيعىزعانداي ءاپ-ساتتە ءبىر ۋىس ەتىپ بۇرىستىرە قويعان ىندەت دالەل. ءمۇيىزى قاراعايداي الپاۋىت مەملەكەتتەردىڭ شاڭىراعى شايقالعان تۇستا ءبىز دە تالاي شىعىنعا ۇشىرادىق – ايتۋلى ازاماتتاردان ايىرىلدىق, وتاندىق مەديتسينا سالاسىنداعى كەم-كەتىكتەر مەن جەتىسپەۋشىلىكتەردىڭ بەتى اشىلدى.
ىندەتتىڭ ەكىنشى تولقىنى بولا ما, جوق پا – بەلگىسىز, الايدا قانداي جاعدايعا دا دايىن بولۋ قاجەتتىگى ماڭىزدى. وسى ورايدا ەلىمىزدە كۇزدە ورىن الۋى ىقتيمال ىندەتتىڭ ەكىنشى تولقىنىنا دايىندىق جۇمىستارى جۇرۋدە.
جالپى 3334 ادام ۆيرۋس جۇقتىرىپ, 2612 ناۋقاس ايىققان, ياعني ناۋقاستاردىڭ 80%-ى ساۋىعىپ شىققان ماڭعىستاۋ وبلىسىندا سوڭعى ونكۇندىكتە بىردە-ءبىر كوروناۆيرۋس ينفەكتسياسىن جۇقتىرۋشى تىركەلمەگەن. ەندىگى كەزەكتە ايماقتا كوروناۆيرۋستىق ينفەكتسيانىڭ ەكىنشى تولقىنىنىڭ الدىن الۋ جوسپارى جاساقتالىپ, ىندەتكە قارسى دايىندىق جۇمىستارى جۇرگىزىلۋدە.
– ماڭعىستاۋدا ەپيدەميالىق احۋالعا سايكەس 170 ادامعا ارنالعان 9 ينفەكتسيالىق ستاتسيونار بار. رەزەرۆتەگى 11 ينفەكتسيالىق ستاتسيوناردا 1835 توسەكتىك ورىن دايىن. كادر رەزەرۆى جاساقتالدى. قازىرگى ۋاقىتتا 183 دارىگەر دايىندالدى, دەسە دە قاجەتتىلىك 75 دارىگەردى قۇرايدى. ال اقتاۋ قالاسىندا 200 ورىندى تەز قۇراستىرمالى مودۋلدىك ينفەكتسيالىق اۋرۋحاناسى سالىنىپ جاتىر. بارلىق قۇرال-جابدىقتارمەن قامتاماسىز ەتىلگەن. قازان ايىندا اشىلادى دەپ كۇتىلۋدە, – دەيدى وبلىستىق دەنساۋلىق ساقتاۋ باسقارماسىنىڭ باسشىسى جامال جامانباەۆا.
باسقارما باسشىسىنىڭ ايتۋىنشا, ءوڭىردىڭ مەديتسينا مەكەمەلەرىن ءدارى-دارمەكپەن قامتاماسىز ەتۋ ماقساتىندا جۇمىستار جولعا قويىلعان.
– قازىرگى ۋاقىتتا وبلىس كولەمىندەگى ينفەكتسيالىق جانە پروۆيزورلىق ستاتسيونارلاردا 30 مىڭنان استام انتيكواگۋليانتتار گەپارين, كلەكسان, فراكيسپارين, باكتەرياعا قارسى 2 مىڭنان استام تسەف-4, 35 مىڭ تسەف-3, 40 مىڭعا جۋىق تسەفتازيديم, 8 مىڭعا جۋىق ازيتروميتسين جانە ت.ب باكتەرياعا قارسى پرەپاراتتار بار. وعان قوسا 25 مىڭعا جۋىق دەكسامەتازون جانە 30 مىڭعا جۋىق پرەدنيزولون پرەپاراتتارى بار. قور كولەمى 3 ايدان استام ۋاقىتقا جەتەدى دەپ جوسپارلاندى, – دەدى ول.
سونداي-اق وڭىردە مەديتسينالىق ۇيىمدارعا جەكە كاسىپكەرلەر مەن كومپانيالار دەمەۋشىلىگىمەن ءوجت (وكپەنى جاساندى تىنىستاندىرۋ) اپپاراتتارىن الۋ جۇمىستارى توقتاعان جوق. كوپشىلىك جيىلعان جەرلەرگە بارماۋ, بەتپەردە جانە انتيسەپتيك قولدانۋ سىندى الدىن الۋ ساقتىق شارالارى تۇرعىندار اراسىندا تۇراقتى ناسيحاتتالىپ كەلەدى.
ماۋسىم ايلارىندا ىندەت قاھارىنا مىنگەن كەزدە اياق استىنان جەدەل ۇيىمداستىرۋ جۇمىستارىن جۇرگىزىپ, وبلىستىق اۋرۋحانانى تۇتاستاي پروۆيزورلىق ورتالىققا اينالدىرىپ, اپپارات جەتپەي داعدارعان, بىراق قيىندىققا شىڭدالا ءجۇرىپ قىزمەت ەتكەن ماڭعىستاۋ دارىگەرلەرى قولدا بار مۇمكىندىككە ساي دايىندىقتارىن پىسىقتاۋدا.
ماڭعىستاۋ وبلىسى