ەلوردادا كومىردى قايدان ساتىپ الۋعا بولادى

قالاداعى جەكە سەكتور تۇرعىندارىنا جىلىتۋ ماۋسىمىنا الدىن الا دايىندالىپ, سۋىق تۇسكەنگە دەيىن قاجەتتى مولشەردە كومىر ساتىپ الۋ قاجەتتىگىن ەسكەرتەدى.

قالادا كومىر تاسىمالدايتىن 7 كومپانيا بار, ءتۇرلى اۋدانداردا ورنالاسقان وتىن ساتاتىن 11 نۇكتە بار. كومىردىڭ ورتاشا باعاسى سورتىنا بايلانىستى 12 مىڭ تەڭگەنى قۇرايدى. وتىننىڭ باعاسى مەن مولشەرى تۋرالى تولىعىراق اقپاراتتى 109 جەدەل جەلى ءنومىرى ارقىلى بىلۋگە بولادى.

"بۇگىنگى تاڭدا قالادا كومىر ساتۋ بويىنشا 11 ورىن بار, وندا جەتى كومپانيا ءوز قىزمەتىن ۇسىنادى. اتالعان ۋچاسكەلەردە كومىردىڭ باعاسى بەلگىلى ءبىر ماركا بويىنشا تىركەلدى, ياعني باسقارما جانە وسى كومپانيالار باعانىڭ وسۋىنە جول بەرمەۋ ءۇشىن مەموراندۋمدار جاسادى. بىزدە كۇن سايىن 20 مىڭ توننا كولەمىندە كومىر قورى ساقتالۋدا. ازىرگە دۇرلىگۋ جوق, تۇرعىندارعا كومىر بىردەي ءبولىنۋ ءۇشىن كومىر ساتىپ الۋدى قازىردەن باستاعان ءجون", – دەپ اتاپ ءوتتى قالالىق "وتىن - ەنەرگەتيكالىق كەشەن جانە كوممۋنالدىق شارۋاشىلىق باسقارماسىنىڭ" وتىن-ەنەرگەتيكالىق رەسۋرستار ءبولىمىنىڭ باسشىسى ماقسات ەسماعۇلوۆ.

اتاپ ايتقاندا, كومىر ساتۋ نۇكتەلەرى مىنا مەكەنجايلار بويىنشا ورنالاسقان: گەرتسەن, 4/1, 40-ست.; گەرتسەن, 6 ب; كوكتال, 28/1; جۇبانوۆ, 35; ليتەينايا, 44; جاباەۆ, 68; ماقات, 40.

ەلوردالىقتار قاتتى وتىندى سۋىق تۇسكەننەن باستاپ ساتىپ الادى. سۇرانىس قازان مەن قاراشا ايىنىڭ باسىندا كوپ بولادى. وسى كەزەڭدە كومىرگە كەزەك پايدا بولادى, بۇل كومىر تاپشىلىعىنا اكەپ سوعادى, دەپ اتاپ ءوتتى باسقارمادا. كومىر ونىمدەرىن ساقتاۋعا كەلەتىن بولساق, قاراڭعى بولمەگە قويىپ, ىلعال مەن تىكەلەي كۇن ساۋلەسىنىڭ تۇسۋىنە جول بەرمەۋ قاجەت. سول كەزدە وتىن ءوزىنىڭ قاسيەتتەرىن جوعالتپايدى.

بۇدان باسقا, تۇرعىن ءۇي الاپتارىندا گازبەن جابدىقتاۋ جەلىلەرىن سالۋ بويىنشا جۇمىستار جالعاسۋدا. مىسالى, جەلەزنودوروجنىي تا گاز تاراتۋ جەلىلەرى - 100% جابدىقتالسا, ونەركاسىپتىك جانە كوكتال-2 – 95%, كوكتال-1 – 80% سالىندى. بۇل جۇمىستار اگروگورودوك, وڭتۇستىك-شىعىس تۇرعىن الابىندا دا جۇرگىزىلۋدە. وسى تۇرعىن الاپتارداعى ۇيلەر, ونىڭ ىشىندە اگروقالاشىقتاعى ۇيلەردىڭ ءبىر بولىگى بيىلعى جىلىتۋ ماۋسىمىندا گازبەن جىلىتىلۋى مۇمكىن.

ۇيلەردى گازبەن جابدىقتاۋ جەلىلەرىنە قوسىلىپ, تەگىن تەحنيكالىق شارت الۋ ءۇشىن تۇرعىن الاپتارىندا فرونت-كەڭسەلەر اشىلدى. سونىمەن قاتار, بيىل جەو-1 جانە جەو-2 قازاندىقتارىن گازعا كوشىرۋ جوسپارلانۋدا.