سوڭعى سەگىز ايدا ەلدىڭ ىشكى جالپى ءونىمى 3 پايىزعا تومەندەدى. بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترى رۋسلان دالەنوۆ ايتتى, دەپ حابارلايدى Egemen.kz.
قاڭتار-تامىز ايلارى ارالىعىندا ەلدىڭ الەۋمەتتىك-ەكونوميكالىق دامۋ قورىتىندىسى تۋرالى ەسەپ بەرگەن ءمينيستردىڭ ايتۋىنشا, ەكونوميكانىڭ ناقتى سەكتورىندا ءوسىم بايقالۋدا. ولار - قۇرىلىس, اۋىلشارۋاشىلىعى جانە وڭدەۋ ونەركاسىبى.
"دايىن تاۋارلار ەكسپورتىنىڭ ۇلعايۋى بايقالادى. جىلدىق ينفلياتسيا 7 پروتسەنتكە دەيىن باسەڭدەدى. تاۋارلار ءوندىرىسى 1,7 پايىزعا ءوستى, سونىمەن قاتار كورسەتىلەتىن قىزمەتتەر 6,1 پايىزعا قىسقاردى. ناتيجەسىندە جالپى ىشكى ءونىم 3 پايىزعا قىسقارعان", - دەدى ول.
وندىرىستىك سەكتور سالالارىندا, ونىڭ ىشىندە قۇرىلىس 6,5 %, اۋىلشارۋاشىلىعى 4,9 % جانە وڭدەۋ ونەركاسىبى 3,3 % ءوسۋ كورسەتتى.
"ناقتى سەكتور باسەكەگە قابىلەتتىلىكتىڭ جاقسى ناتيجەسىن كورسەتۋدە. ماسەلەن ەسەپتى كەزەڭدە ماشينا جاساۋ, 51 پايىزعا, فارماتسەۆتيكا 34,1 پايىزعا, دايىن مەتالدار ءوندىرىسى 38,8 پايىزعا ارتقان. ەسەپتى كەزەڭدە قازاقستان الەمنىڭ 105 ەلىنە تاۋار ەكسپورتتادى. اۆتوموبيل ەكسپورتى 7 پايىزعا, كۇنباعىس مايى 74 پايىزعا ارتقان", - دەدى مينيستر.