قازاقستاندىق تەننيسشى يۋليا پۋتينتسەۆا نيۋ-يوركتە ءوتىپ جاتقان جۇلدە قورى 53 400 000 ميلليون دوللاردى قۇرايتىن اقش-تىڭ اشىق بىرىنشىلىگىنىڭ شيرەك فينالىندا ءسۇرىندى, دەپ حابارلايدى Egemen.kz.
ەگەر پۋتينتسەۆا وسى مەجەدەن سۇرىنبەي وتكەندە "ۇلكەن دۋلىعا" ساناتىنداعى جارىستاردىڭ جەكەلەگەن سايىسىندا جارتىلاي فينالعا دەيىن جەتكەن قازاقستاننىڭ تۇڭعىش تەننيسشىسى رەتىندە ءوز ەسىمىن تاريحتا قالدىراتىن ەدى. بىراق بۇل جولى ونداي باق وعان بۇيىرمادى. جەرلەسىمىز دجەننيفەر برەيديگە ەسە جىبەردى.
نەگىزى اقش-تىڭ وكىلى دە "اناۋ ايتقانداي" الىنبايتىن اسۋ ەمەس ەدى. 25 جاستاعى پەنسيلۆانيا شتاتىنىڭ تۋماسى بۇعان دەيىن وسىنداي وراسان زور تابىسقا قول جەتكىزگەن ەمەس. WTA تۋرنيرلەرىندە نەبارى ءبىر مارتە عانا توپ جارعانى ەسىمىزدە. بۇگىنگى تاڭدا برەيدي الەمدىك رەيتينگتە 41-ورىنعا جايعاستى. ال يۋليا ودان التى ساتى جوعارى تۇر. سوعان قاراماستان بۇل باسەكەدە امەريكالىق ويىنشىنىڭ اسىعى الشىسىنان ءتۇستى. 1 ساعات 11 مينۋتكە سوزىلعان سايىس 3:6, 2:6 ەسەبىمەن اياقتالدى.
جارتىلاي فينالدا دجەننيفەر برەيدي ءوزىنىڭ وتانداسى شەلبي رودجەرس پەن جاپونيالىق ناومي وساكا اراسىنداعى كەزدەسۋدىڭ جەڭىمپازىمەن شەبەرلىك بايقاسادى.