اقتوبە وبلىسىندا كوروناۆيرۋس ىندەتىمەن كۇرەسكە جۇمىلدىرىلعان مەديتسينا قىزمەتكەرلەرىنىڭ جالاقىسى كەشىكتىرىلىپ جاتىر. وبلىستىق دەنساۋلىق ساقتاۋ باسقارماسى ماسەلەگە قاتىستى تۇسىنىك بەردى, دەپ حابارلايدى Egemen.kz قازاقپاراتقا سىلتەمە جاساپ.
اقتوبە وبلىستىق دەنساۋلىق ساقتاۋ باسقارماسىنىڭ باسشىسى سامات دانياروۆتىڭ ايتۋىنشا, جالاقىنىڭ كەشىكتىرىلۋى الەۋمەتتىك مەديتسينالىق ساقتاندىرۋ قورىنىڭ كورسەتىلگەن مەديتسينالىق كومەك ءۇشىن تاريفتەردى قايتا ەسەپتەۋىمەن بايلانىستى.
"پاندەميا كەزىندە اۋرۋحانالار پروۆيزورلىق ستاتسيونارعا اينالدى. ال مەديتسينا قىزمەتكەرلەرى كوروناۆيرۋس ينفەكتسياسى جانە وكپە قابىنۋى دەرتىمەن كۇرەسكە جۇمىلدىرىلدى. ءومىرىن قاۋىپكە تىككەنى ءۇشىن قوسىمشا اقى قاراستىرىلعان بولاتىن. پاندەميانى ەشكىم كۇتكەن جوق, سوندىقتان جوسپاردان تىس تاعى قوسىمشا اقشا جۇمساۋعا تۋرا كەلدى. سونىمەن بىرگە قىزمەتكەرلەردىڭ نەگىزگى جۇمىسىنىڭ جالاقىسى ساقتالدى, ۇستىنە قوسىمشا تولەندى. ءارى مەديتسينالىق ساقتاندىرۋ قورى ءتاريفتى قايتا قارادى. مۇنىڭ ءبارى جالاقىنىڭ كەشىگۋىنە سەبەپ بولدى. بۇگىندە ماۋسىم جانە شىلدە ايىنىڭ تولەمى بەرىلدى. بىرەر كۇندە تامىز ايىنىڭ ەڭبەكاقىسى اۋدارىلادى. بۇل تەك بىرنەشە اۋرۋحانا قىزمەتكەرىنە قاتىستى ماسەلە. اقتوبە مەديتسينالىق ورتالىعىنىڭ ەرەسەكتەر جانە بالالار كلينيكاسى, وبلىستىق فتيزيوپۋلمونولوگيالىق ورتالىعى بار. سوڭعىسى بەرەشەكتى تولىق وتەدى", دەدى سامات دانياروۆ.
وبلىستا ىندەتپەن كۇرەس جۇمىستارىنا 2 ميلليارد تەڭگەدەن استام قارجى ءبولىندى. شىلدە ايىندا قارجىنىڭ بارلىعى جۇمسالعان.
"قوسىمشا قارجىلاندىرۋدى كۇتپەي ءبىز قوردان 1 ميلليارد تەڭگەدەن استام قارجىنى ءبولىپ, قارىزعا بەردىك. قازىرگى ۋاقىتتا بيۋدجەتتەن 2 ميلليارد تەڭگەدەن استام قارجىنى ءبولۋ ماسەلەسى قاراستىرىلىپ جاتىر. بىرەر كۇندە تامىز ايىنىڭ جالاقىسىن تولەۋ جوسپاردا بار. تەحنيكالىق قيىندىقتار دا بولدى. مينيسترلىك كومەگىمەن شەشىلىپ جاتىر", دەدى "مىندەتتى الەۋمەتتىك مەديتسينالىق قورى" اوف ديرەكتورى باتىربەك نۇرعاليەۆ.