قازاقستاندىقتار مەرزىمىنەن بۇرىن شەشىپ العان زەينەتاقى سوماسىنا 10% مولشەرىندە سالىق تولەيتىن بولادى, دەپ حابارلايدى Egemen.kz قازاقپاراتقا سىلتەمە جاساپ.
قر قارجى مينيسترلىگى مەملەكەتتىك كىرىستەر كوميتەتىنىڭ ءباسپاسوز قىزمەتىنەن ءمالىم ەتكەندەي, قولدانىستاعى سالىق زاڭناماسىنا سايكەس, بىرىڭعاي جيناقتاۋشى زەينەتاقى قورى زەينەتاقى جيناعىنان بەرەتىن تولەمدەرگە جەكە تابىس سالىعى سالىنادى (سالىق كودەكسىنىڭ 326-بابى).
"بۇل رەتتە, جەكە تۇلعالار ەڭ تومەنگى 1 جالاقى مولشەرىندەگى (42 500 تەڭگە) سالىقتىق شەگەرىمدى قولدانۋ ارقىلى سالىق سالىناتىن سومانى ازايتۋعا قۇقىلى. سونىمەن قاتار, حالىقتىڭ الەۋمەتتىك وسال توپتارى (ۇوس-نا قاتىسۋشىلارعا تەڭەستىرىلگەندەر, بارلىق توپتاعى مۇگەدەكتەر, مۇگەدەكتەردىڭ اتا-انالارى مەن قامقورشىلارى, جەتىم بالالاردى اسىراۋىنا العان اتا-انالار) تاعى قوسىمشا 882 ايلىق ەسەپتىك كورسەتكىش (1 اەك - 2778 تەڭگە) مولشەرىندە شەگەرىم قولدانۋعا قۇقىلى. بۇل - 2,3 ملن تەڭگەنى قۇرايدى (سالىق كودەكسىنىڭ 345, 346, 353-باپتارى). تيىسىنشە, كورسەتىلگەن شەگەرىمدەردى ەسكەرە وتىرىپ, تۇرعىن ءۇي ساتىپ الۋعا, ەمدەلۋگە جانە باسقا دا رۇقسات ەتىلگەن ماقساتتارعا زەينەتاقى اقشاسىنان ءىشىنارا الىناتىن سومالارعا 10% مولشەرىندە جەكە تابىس سالىعى سالىنادى", دەدى كوميتەت قىزمەتكەرلەرى.
ەسكە سالايىق, قازاقستان حالقىنا جولداۋىن جاريا ەتكەن قر پرەزيدەنتى قاسىم-جومارت توقاەۆ 2021 جىلدان باستاپ زەينەتاقى جيناعىن ءىشىنارا شەشىپ الۋعا بولاتىنىن ايتقان ەدى. وسى رەتتە, ەڭبەك جانە حالىقتى الەۋمەتتىك قورعاۋ مينيسترلىگى زەينەتاقى جيناقتارىن پايدالانۋدىڭ "جەتكىلىكتىلىك شەگىن" جاريالادى.
ياعني 20-59 (جانە ودان جوعارى) جاستاعى ازاماتتار «جەتكىلىكتىلىك شەگىنەن» اسىرا جيناعان زەينەتاقى سوماسىن شەشىپ الا الادى. ول اقشانى تۇرعىن ءۇي جاعدايىن جاقسارتۋعا , ەمدەلۋگە نەمەسە قارجى كومپانيالارىنا باسقارۋعا بەرۋگە جۇمساۋعا بولادى. ەگەر ماقساتتى پايدالانۋعا قاجەت بولسا, وتباسى مۇشەلەرىنىڭ قاراجاتىن بىرىكتىرۋگە بولادى.