سەناتتا اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ كەڭەيتىلگەن وتىرىسى بولدى, دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.
دەپۋتاتتار "قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەرەكشە قورعالاتىن تابيعي اۋماقتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسى زاڭىنىڭ جوباسىن قارادى. بۇل زاڭ جوباسى پارلامەنت دەپۋتاتتارىنىڭ باستاماسى بويىنشا ازىرلەنگەن بولاتىن.
زاڭ جوباسىنىڭ ماقساتى ەرەكشە قورعالاتىن تابيعي اۋماقتاردىڭ قۇرامىنا تۋريزم, سۋ شارۋاشىلىعى قۇرىلىسى نىساندارىن سالۋ جانە ولاردىڭ جۇمىس ىستەۋى, قازاقستان رەسپۋبليكاسى مەملەكەتتىك شەكاراسىنىڭ وبەكتىلەرىن جايلاستىرۋ جانە ولاردىڭ جۇمىس ىستەۋى, قورعانىس مۇقتاجى ءۇشىن ولاردىڭ قۇرامىنان بۇرىن شىعارىلعان جانە اتالعان ماقساتتاردا پايدالانىلمايتىن بوسالقى جەرلەردى قايتارۋ ءراسىمىن وڭايلاتۋ بولىپ تابىلادى.
زاڭ جوباسىنىڭ ەرەجەلەرى "كوكجايلاۋ" تاۋ شاڭعىسى كۋرورتىن سالۋ ءۇشىن ەرەكشە قورعالاتىن تابيعي اۋماقتاردىڭ جەرلەرىنەن بوسالقى جەرلەرگە بۇرىن اۋىستىرىلعان پايدالانىلماعان جەرلەردى جانە «بۋراباي» اەا تۋريستىك كەشەنى ءۇشىن بەرىلگەن جەكەلەگەن ۋچاسكەلەردى قايتارۋدى قۇقىقتىق رەتتەۋگە باعىتتالعان.
زاڭ جوباسى قابىلدانعان جاعدايدا ەرەكشە ەكولوگيالىق, عىلىمي, تاريحي-مادەني جانە رەكرەاتسيالىق قۇندىلىعى بار جانە كەرى قايتارىلاتىن جەر ۋچاسكەلەرىندە ورنالاسقان تابيعي كەشەندەر مەن تابيعي-قورىق وبەكتىلەرى ساقتالاتىن بولادى.
كوميتەت زاڭ جوباسىنىڭ تۇجىرىمداماسىنا ءبىراۋىزدان قولداۋ ءبىلدىرىپ, پالاتادا ءبىرىنشى وقىلىمدا قاراۋعا ەنگىزۋدى ۇسىندى.