ءىلىم جانە عىلىم مينيسترلىگى وقۋشىلاردى ءداستۇرلى وقۋعا قايتارۋ تۋرالى اتا-انالاردىڭ پرەزيدەنت پەن ءبىلىم جانە عىلىم مينيسترىنە جازعان پەتيتسياسىنا جاۋاپ بەردى, دەپ حابارلايدى Egemen.kz قازاقپاراتقا سىلتەمە جاساپ.
ايتا كەتسەك بۇعان دەيىن اتا-انالار وقۋشىلاردى ءداستۇرلى وقۋعا قايتارۋ باستاماسىن كوتەرىپ, پرەزيدەنت پەن ءبىلىم جانە عىلىم مينيسترىنە پەتيتسيا جازعان ەدى. ء«بىز, قازاقستاندىق بالالاردىڭ اتا-انالارى, وقۋشىلاردىڭ قازاقستان رەسپۋبليكاسى كونستيتۋتسياسىنىڭ 30-بابىندا كورسەتىلگەن ورتا ءبىلىم الۋ قۇقىعى تولىق كولەمدە - كاسىبي مۇعالىمدەردىڭ تىكەلەي قاتىسۋىمەن بارلىق پاندەر بويىنشا قامتاماسىز ەتىلۋىن تالاپ ەتەمىز. مەكتەپتەگى ءبىلىم كۇندىز ءارى وقۋ ورنىندا بولۋى كەرەك. ونى تسيفرلىق سۋرروگات الماستىرماۋى كەرەك. تسيفرلىق تەحنولوگيالاردى تەك قوسىمشا ادىستەر رەتىندە, ەرەجەلەرمەن بەكىتىلگەن قاتاڭ شەكتەۋلى كولەمدە جانە تەك ەرىكتى نەگىزدە پايدالانۋعا بولادى", دەلىنگەن پەتيتسيادا.
ءبىلىم جانە عىلىم مينيسترلىگىنىڭ ءباسپاسوز حاتشىسى گاۋحار وماربەك بۇل پەتيتسياعا قاتىستى پىكىر ءبىلدىردى.
"قازىرگى ۋاقىتتا باستاۋىش سىنىپ وقۋشىلارى اتا-انالارىنىڭ ءوتىنىشى بويىنشا مەكتەپتەردە وقي الادى. سونداي-اق, 3 مىڭعا جۋىق شاعىن جيناقتى مەكتەپ وقۋشىلارى (ياعني 1-11 سىنىپ وقۋشىلار) ءداستۇرلى فورماتتا وقىپ جاتىر. قالعان مەكتەپ وقۋشىلارى ءۇشىن سانيتارلىق دارىگەرلەر ءداستۇرلى وقىتۋ فورماتىنا كەزەڭ-كەزەڭمەن كوشۋگە بولاتىنىن حابارلاعاننان كەيىن عانا, ءبىز بۇل پروتسەستى باستاي الامىز. باس سانيتار دارىگەردىڭ شەشىمى شىقسا عانا ءار مەكتەپتىڭ اكىمشىلىگى ءتيىستى كەستە جاسايدى جانە ءبىز بالالار مەن اتا-انالارعا ءتيىستى اقپاراتتى جەتكىزە الامىز", دەدى ول.