ءۇش مىلتىقپەن اڭعا شىققان "سەرى" ۇستالدى

كۇزگى اڭشىلىق ماۋسىمى 5 قىركۇيەكتە اشىلدى. وسى مەزەتتى اسىعا كۇتكەندەر قازىر جاپپاي اڭعا شىعىپ جاتىر. سولتۇستىك قازاقستان وبلىستىق پد تابيعات قورعاۋ ءبولىنىسى دە بۇل كەزدە كۇشەيتىلگەن رەجىمدە جۇمىس ىستەۋگە كوشەدى. ويتكەنى, اڭشىلىققا رۇقسات بەرىلدى ەكەن دەپ ەشقانداي رۇقسات قاعازسىز كوزدى جۇمىپ مىلتىقتى تارسىلداتا بەرەتىندەر كوپ. وندايلاردىڭ تاعى ءبىر سۇيىكتى ءىسى – اشىق تابيعات اياسىندا بوتەلكەلەردى بوساتۋ. ال ونداي كوڭىلدى وتىرىستاردىڭ اياعى قاۋىپتى قىلىقتارعا ۇلاسىپ جاتادى. ونىڭ ۇستىنە ءبارىنىڭ دە قولدارىندا مىلتىق بولعان سوڭ جاعداي ءتىپتى كۇردەلەنە تۇسەدى. 

جوعارى اتالعان LADA Granta اۆتوماشيناسى دا ءدال وسى كۇنى ۇستالدى. مامليۋت اۋداندىق پوليتسيا ءبولىمىنىڭ ينسپەكتورى راشيد ۆاليەۆ پەن اۋداندىق اڭشىلىق قوعامىنىڭ ەگەرى ەكەۋى كەزەكشىلىكتە ءجۇرىپ ونى توقتاتقان. 33 جاسار جۇرگىزۋشىنىڭ مىلتىقتارعا يەلىك ەتۋ, تىركەلۋ, سونداي-اق اڭشىلىققا رۇقسات قاعازى بولماعان. ماشينادان مىلتىقتارمەن بىرگە 18 وق الىنعان. قازىر ونىڭ ۇستىنەن ءۇش اكىمشىلىك حاتتاما تولتىرىلىپ, ءىسى سوتقا جىبەرىلدى. مىلتىقتار زاڭسىز بولعاندىقتان تاركىلەنگەن.

تابيعات قورعاۋ پوليتسياسىنا اڭشىلىق ماۋسىمى باستالعان وسى ساتتەن دامىل جوق.  5 قىركۇيەكتەن باستاپ جىل قۇستارىن اتۋعا رۇقسات بەرىلسە, ودان ءارى قۇرلاردى, بۇلانداردى, قابانداردى, ەلىكتەردى اتۋعا دا رۇقسات بەرىلەدى. ال قاراشا ايىنان باستاپ تۇلكى, قارساق, قويان اۋلاۋعا دا رۇقسات. اڭعا قۇمار جاندار وسى كەزدى جىبەرمەۋگە تىرىسادى. بىراق ءبارى بىردەي اڭشى كۋالىگى, تولەنگەن گوسپوشلينانىڭ تۇبىرتەگى, اڭ شارۋاشىلىعىنان جولداماسى قولدارىندا بولۋى كەرەكتىگىن بىلە بەرمەيدى. كەيبىرەۋى بىلسە دە, سونداي قۇجاتتاردى الىپ جۇرۋگە مويىندارى جار بەرمەيدى.  

جالپى تابيعات قورعاۋ سالاسىنداعى قىلمىستاردىڭ, بۇزۋشىلىقتاردىڭ الدىن الۋ سقو  پد ۇنەمى نازارىندا. جىل باسىنان بەرى "براكونەر", "تازا قازاقستان" جەدەل-پروفيلاكتيكالىق شارالارى جۇرگىزىلگەن. سوڭعى سەگىز ايدا وسى سالا بويىنشا 655  قۇقىق بۇزۋشىلىق بەلگىلى بولدى. ونىڭ ىشىندە 393 اڭ-قۇس, 245 بالىق اۋلاۋ جانە 11 وسىمدىك الەمى بويىنشا انىقتالدى. وسى بۇزۋشىلىقتار بويىنشا جىل باسىنان بەرى 22 قىلمىستىق ءىس قوزعالدى.  قازاق ەجەلدەن اڭ-قۇستى جاپپاي قىرۋعا, جەردى كۇيدىرۋگە, ءتىپتى ءوسىپ تۇرعان ءشوپتى جاپىرۋعا رۇقسات بەرمەيتىن حالىق. اتا-بابامىز ايالاعان تابيعاتتى بۇگىنگى ۇرپاق تا كۇتۋ كەرەك ەكەندىگى ابزال بورىشىمىز.