"استانا وپەرا" تەاترى جاڭا ماۋسىمىن اشادى

18 قىركۇيەك كۇنى Tengri TV مەن "استانا وپەرانىڭ" YouTube-ارناسىنان تىكەلەي ەفيردە تەاتردىڭ باس ديريجەرى, الەمگە ايگىلى ماەسترو الان بورىباەۆتىڭ جەتەكشىلىگىمەن "وپەرالىق كلاسسيكاعا ساياحات" اتتى گالا-وپەرا باعدارلاماسىن ۇسىنادى.

گالا-وپەرا تەاتردىڭ ۇلكەن زالى ساحناسىنان ونلاين وتەدى. باعدارلاماعا ۇلتتىق جانە الەمدىك مۇرانىڭ ۇزدىك ۇلگىلەرى – ا.جۇبانوۆ, ل.ءحاميديدىڭ "اباي", دج.ءروسسينيدىڭ "سەۆيلدىك شاشتاراز", پ.چايكوۆسكيدىڭ "ەۆگەني ونەگين" وپەرالارىنان كورىنىستەر ەنگەن. تىڭدارمان الدىندا ەلوردالىق ترۋپپانىڭ تانىمال سوليستەرى ونەر كورسەتپەك.

تەاتر ديرەكتسياسى 2020 جىلدىڭ ەكىنشى جارتىسى مەن 2021 جىلى جۇرتشىلىقتى ايتۋلى پرەمەرالار مەن عالامات كونتسەرتتىك باعدارلامالار كۇتەتىنىن ايتتى. قازان ايىنىڭ باسىندا گ.دونيتسەتتيدىڭ "دون پاسكۋالە" وپەراسىنىڭ پرەمەرالىق ونلاين-كورسەتىلىمى وتەدى, جاڭالىقتار تىزبەگىن ۆ.ا.موتسارتتىڭ مۋزىكاسىنا كورنەكتى حورەوگراف ي.كيلياننىڭ قويىلىمىنداعى "التى بي" ەكسكليۋزيۆتى بالەتى جالعاستىرماق. ودان كەيىن تەاترسۇيەر قاۋىم نازارىنا كوپتەن كۇتكەن پرەمەرالار: گ.دونيتسەتتيدىڭ "ماحاببات سۋسىنى" وپەراسى جانە ت.قاجىعاليەۆ, ر.گايسين مەن ك.پينو-كانتانانىڭ مۋزىكاسىنا پاتريك دە بانانىڭ قويىلىمىنداعى "دالا ءۇنى" ۇلتتىق بالەتى ۇسىنىلماق.

تيبور كوچاكتىڭ مۋزىكاسىنا ديۋلا حارانگوزونىڭ "اقشاقار مەن جەتى ەرگەجەيلى" بالەتتىك سپەكتاكلى بارشاعا كىشكەنتايىنان تانىس ەرتەگى جەلىسىمەن جاڭا قىزىقتى ينتەرپرەتاتسيادا ونەرسۇيەر قاۋىمعا جول تارتادى. اسقاق كلاسسيكا جانكۇيەرلەرىنە الدىمىزداعى جىلدىڭ باستى پرەمەراسى – ە.راحماديەۆتىڭ "الپامىس" ۇلتتىق وپەراسىن ۇسىنباق.

"بۇل ماۋسىمدى ءبىز وزىمىزگە توسىن, داعدىلانباعان فورماتتا اشقالى وتىرمىز: ارتىستەر زالداعى كورەرمەنسىز ساحنادا ونەر كورسەتەتىن بولادى. قويىلىمدار مەن كونتسەرتتەردىڭ تىكەلەي كورسەتىلىمدەرى قىركۇيەك ايىنا جوسپارلانىپ وتىر. قازىرگى ساتتە سوليستەر وسىنشالىق ۇزاق ۇزىلىستەن كەيىن جۇمىسقا بەلسەنە كىرىسىپ كەتتى. ولار دايىندىق زالدارىندا ونەرلەرىن شىڭداۋدا, الايدا, تىڭدارماندارمەن العاشقى كەزدەسۋىمىز ونلاين-فورماتتا وتەتىندىگىنە قاراماستان, ءسوزسىز, قوبالجۋ ۇستىندە. تەاتردىڭ كوركەمدىك كەڭەسى ۇلتتىق جانە الەمدىك وپەرا مەن بالەت كلاسسيكاسىن, كامەرالىق مۋزىكا كونتسەرتتەرى جانە, البەتتە, بالالار مەن جاسوسپىرىمدەر اۋديتورياسى باعدارلاماسىن قامتيتىن سەگىزىنشى ماۋسىمنىڭ مازمۇندى رەپەرتۋارىن ازىرلەدى. كوپتەگەن جوسپارلارىمىز كوروناۆيرۋس پاندەمياسىنىڭ كەسىرىنەن جۇزەگە اسىرىلماعان بولاتىن. كارانتينگە قاراماستان, ءبىز ونلاين رەجيمدە بەلسەندى جۇمىس اتقاردىق, كوپتەگەن ءتۇرلى جوبالار جاسادىق جانە قاشان دا ءبىزدىڭ تەاتردىڭ ونەرىن ءسۇيىپ تاماشالايتىن ازاماتتاردان وڭ پىكىرلەر مەن حاتتار تۇرىندە جاۋاپتار الىپ وتىردىق", - دەدى قازاقستاننىڭ ەڭبەك سىڭىرگەن قايراتكەرى, "استانا وپەرا" تەاترىنىڭ ديرەكتورى عالىم احمەدياروۆ.