امەريكالىق بەدەلدى بەيبىتشىلىك جانە يادرولىق قارۋسىزدانۋ جونىندەگى "Arms Control Association" ۇكىمەتتىك ەمەس ۇيىمى "Center for Policy Research" (SUNY-Albany) زەرتتەۋ ورتالىعىمەن بىرلەسىپ, 29 تامىز – يادرولىق سىناقتارعا قارسى حالىقارالىق ءىس-قيمىل كۇنىنە وراي ارنايى ۆيرتۋالدى بريفينگ وتكىزدى, دەپ حابارلايدى Egemen.kz.
ءىس-شارانىڭ اشىلۋىندا قازاقستاننىڭ اقش-تاعى ەلشىسى ەرجان قازىحانوۆ وسى داتانىڭ قازاقستان ءۇشىن سيمۆوليكاسى مەن ماڭىزدىلىعىن اتاپ ءوتتى. سەمەي يادرولىق سىناق پوليگونى 1991 جىلى 29 تامىزدا قازاقستاننىڭ تۇڭعىش پرەزيدەنتى - ەلباسى نۇرسۇلتان نازارباەۆتىڭ جارلىعىمەن جابىلعانى ءمالىم. سونداي-اق, قازاقستاننىڭ ەلشىسى يادرولىق سىناقتارعا جاپپاي تىيىم سالۋ تۋرالى كەلىسىمدى العاشقى امبەباپتاندىرۋ يادرولىق قارۋدان ازات الەمگە قول جەتكىزۋدىڭ تاپتىرماس شارتى بولۋى قاجەتتىگىن جەتكىزدى.
امەريكالىق جانە حالىقارالىق ساراپشىلار يادرولىق سىناقتارعا جاھاندىق ءموراتوريدى ساقتاۋ جانە يادرولىق قارۋدى تاراتپاۋ رەجيمىن نىعايتۋ بويىنشا ءتيىمدى شارالاردىڭ, سونداي-اق قازاقستاننىڭ جاپپاي تاراتپاۋ جانە قارۋسىزدانۋ سالاسىنداعى كەڭىنەن قولداۋ تاپقان باستامالارىنىڭ وزەكتىلىگىن اتاپ ءوتتى.
يادرولىق سىناقتارعا قارسى حالىقارالىق كۇن 29 تامىزدا اتاپ وتىلەدى. ول قازاقستاننىڭ باستاماسىمەن 2009 جىلى 2 جەلتوقساندا بۇۇ باس اسسامبلەياسىنىڭ 64-سەسسياسىندا 64/35 قارارىمەن ءبىراۋىزدان قابىلداندى.