"Egemen Qazaqstan" گازەتى رەداكتسياسىندا اقپارات جانە قوعامدىق دامۋ ءمينيسترى ايدا بالاەۆانىڭ قاتىسۋىمەن زيالى قاۋىم وكىلدەرى مەملەكەت باسشىسى قاسىم-جومارت توقاەۆتىڭ "جاڭا جاعدايداعى قازاقستان: ءىس-قيمىل كەزەڭى" اتتى جولداۋىن تالقىلادى, - دەپ حابارلايدى Egemen.kz.
دوڭگەلەك ۇستەلگە قر ءماجىلىس دەپۋتاتتارى, ەلىمىزدەگى بەدەلدى جوو باسشىلارى, وبلىستىق گازەتتەردىڭ باس رەداكتورلارى, اقىن-جازۋشىلار مەن ءباسپاسوز وكىلدەرى قاتىستى.
جيىن بارىسىندا ءسوز العان ءماجىلىس دەپۋتاتى دارحان قامزابەك ۇلى ءار جولداۋ رەفورمالاردى جۇزەگە اسىرۋ ءۇشىن جاسالاتىنىن اتاپ ءوتتى.
"پرەزيدەنتتىڭ كەزەكتى جولداۋىندا ساباقتاستىق بار. ويتكەنى مەملەكەت باسشىسى قاسىم-جومارت توقاەۆ وسىدان 5 جىل بۇرىن ەلباسى كوتەرگەن ماسەلەلەردىڭ كوپشىلىگىن ءارى قاراي جۇزەگە اسىرۋدىڭ جولدارىن ۇسىندى. پرەزيدەنت جولداۋدا "كەش قابىلدانعان شەشىمنىڭ ءوزى جاي عانا زيان ەمەس, ول ۇلتتىق قاۋىپسىزدىگىمىزگە قاتەر توندىرەدى" دەدى. ءبىزدىڭ بۇگىنگى جيىن دا وتە دەر كەزىندە جاسالىپ وتىر. ءار دەپۋتاتتىڭ تيىمدىلىگى بولۋى كەرەك. سوندا عانا جاقسى ساپالى زاڭدار بولادى. ءبىزدىڭ اتقارۋشى بيلىك تە زاڭعا جاي قاراي سالماي, بۇكىل بولاشاق ستراتەگيالىق ماقساتىن ورىنداۋىن كوزدەۋگە بارىنشا اتسالىسسىن دەپ ايتىپ وتىر. مەنىڭشە ول وتە دۇرىس ماسەلە", - دەدى ول.
سونداي-اق ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ جولداۋ حالىقتىڭ مۇددەسىنە باعىتتالعانىن ءسوز ەتتى.
"وسىدان 1 جىل بۇرىن سايلاۋالدى ناۋقانعا پرەزيدەنت حالىقتىڭ ۇنىنە قۇلاق اساتىن مەملەكەت قاجەت دەپ ايتقان بولاتىن. سول ءسوز بيلىكتىڭ ۇستانىمىنا اينالىپ كەلە جاتقانىن كورىپ وتىرمىز. سوندىقتان دا بولار وسى ارالىقتا كوپتەگەن ماسەلەلەر كوتەرىلدى. بارىنشا وپەراتيۆتى تۇردە كوپ ماسەلە شەشىلىپ جاتىر. بيلىك پەن حالىق اراسىندا ۇنەمى بايلانىس بولۋى كەرەك. بىزدە حالىقتىڭ ويىن ەستىپ وتىراتىنداي مەحانيزم بولۋى كەرەك. ونى جاسايتىن پارتيالار, قوعامدىق ۇيىمدار, قوعامدىق بىرلەستىكتەر, ءماجىلىس, ءماسليحاتتار. وسى ۇيىمدارعا باسا نازار اۋدارىلدى. قۇجاتتا ولارعا قوسىمشا قۇقىق بەرىلەتىنى ايتىلدى. ءماسليحاتتار بيلىككە پەتيتسيامەن شىعۋعا دەيىن بارۋ كەرەك ەكەنىن ايتىپ وتىر. بۇل رەۆوليۋتسيالىق شەشىم. وسى شەشىم كوڭىلىمىزگە جاقسى ۇيا سالىپ وتىر. بۇل قوعامدىق ۇيىمدار جۇيەلى تۇردە ەكى ارادا بايلانىس جاساپ وتىرعانىمەن, بيلىك پەن حالىقتىڭ ساياسي مادەنيەتىنىڭ دەڭگەيى ءبىر بىرىنە جاقىن بولۋ كەرەك",- دەدى ەرلان سىدىقوۆ.
ايتا كەتەيىك, جيىننان سوڭ ايدا بالاەۆا "Egemen Qazaqstan" گازەتىنىڭ تىلشىلەرىمەن كەزدەستى. باسىلىمنىڭ اتقارىپ جاتقان جۇمىسىنا وڭ باعا بەرگەن مينيستر ۇجىمعا مينيسترلىكتىڭ اتىنان اۆتوكولىك سىيعا تارتتى.