بعم ءبىلىم بەرۋدىڭ ونلاين-پلاتفورمالارىنا بىرىڭعاي تالاپتار ازىرلەيدى

پرەزيدەنت ق. توقاەۆتىڭ تاپسىرماسى بويىنشا مينيسترلىك ۇزدىكسىز ءبىلىم بەرۋ تۇجىرىمداماسىن قالىپتاستىرۋ, قاشىقتىقتان وقىتۋ پلاتفورماسى جانە 6 جاسقا دەيىنگى بالالاردى مەكتەپكە دەيىنگى تاربيەمەن جانە وقىتۋمەن 100% قامتۋعا قول جەتكىزۋ بويىنشا جۇمىس جۇرگىزەتىن بولادى.

بۇل رەتتە, قولدانىستاعى جۇيەدەن ايىرماشىلىعى, مەملەكەتتىك تاپسىرىستى ەندى ءبىلىم بولىمدەرى نەمەسە باسقارمالارى بولمەيتىن بولادى. ونىڭ ورنىنا بالاباقشاعا جولداما العان بالالاردىڭ اتا-انالارى مەكتەپكە دەيىنگى ۇيىمدى وزدەرى تاڭدايدى. ۆاۋچەرلىك تەتىك ەنگىزىلەتىن بولادى, بۇل باسەكەلەستىكتى دامىتۋعا جانە قىزمەتتەر ساپاسىن ارتتىرۋعا ىقپال ەتەدى.

سونىمەن قاتار وقۋ پروتسەسىن تولىققاندى ىسكە اسىرۋ ءۇشىن قر بعم ءبىلىم بەرۋدىڭ ونلاين-پلاتفورمالارىنا بىرىڭعاي تالاپتار ازىرلەيدى. سونداي-اق قر دسم-مەن بىرگە بارلىق سانيتارلىق تالاپتاردى ساقتاي وتىرىپ, ءداستۇرلى وقىتۋ فورماتىنا كوشۋ ءتارتىبى ازىرلەنەتىن بولادى. مۇعالىمدەردىڭ جالاقىسىن 2021 جىلعى 1 قاڭتاردان باستاپ 25%-عا ارتتىرۋ ءۇشىن ءبىلىم جانە عىلىم مينيسترلىگى ءتيىستى ەسەپتەۋلەردى دايىندادى جانە 2023 جىلعا دەيىنگى قارجىلاندىرۋ شەڭبەرىندە قارجى مينيسترلىگىنە ەنگىزدى. ءبىلىم ءمينيسترى اتاپ وتكەندەي, بالالاردىڭ قۇقىقتارىن قورعاۋ ماسەلەسى پرەزيدەنتتىڭ ەرەكشە نازارىندا. ءبىزدىڭ ەلىمىزدىڭ حابارلاما راسىمىنە قاتىستى بالا قۇقىعى تۋرالى كونۆەنتسيانىڭ فاكۋلتاتيۆتىك حاتتاماسىنا قوسىلۋى وتە ماڭىزدى قادام بولادى.

"بالالاردى كيبەربۋللينگتەن قورعاۋ, قوسىمشا ءبىلىم بەرۋ ۇيىمدارىن دامىتۋمەن بىرگە بالالاردىڭ سپورت سەكتسيالارى مەن ۇيىرمەلەرىن جاپپاي اشۋ اكىمدىكتەر مەن ءبىلىم بەرۋ ۇيىمدارى قىزمەتىنىڭ ءسوزسىز باسىمدىقتارى بولادى. وقۋشىلاردى بۇقارالىق سپورت تۇرلەرىمەن قامتۋدى ۇلعايتۋ جونىندەگى جۇمىس جاڭا جانە جۇيەلى نەگىزدە ۇيىمداستىرىلاتىن بولادى. مەكتەپتەردە سپورت زالدارى سالىنىپ, ۇلتتىق جانە بۇقارالىق سپورت ليگالارى دامىتىلادى", — دەدى ا. ايماعامبەتوۆ.

مەكتەپتەر مەن جوعارى وقۋ ورىندارىندا ەكولوگيالىق تاربيە جۇمىستارى باستالدى. ءبىلىم الۋشىلاردىڭ ەكولوگيالىق مادەنيەت, ەكولوگيالىق ءبىلىم جانە تاربيە دەڭگەيىن ارتتىرۋ ءۇشىن ۇزدىكسىز ءبىلىم بەرۋدىڭ كەشەندى مودەلى ەنگىزىلەتىن بولادى. بۇدان باسقا, عىلىمي جانە بيزنەس-قوعامداستىقپەن بىرلەسىپ, ەلدىڭ عىلىمي-تەحنولوگيالىق دامۋى بويىنشا جەكە باعدارلامالىق قۇجات دايىندالادى. قازىر 500 عالىمنىڭ جەتەكشى عىلىمي ورتالىقتاردا عىلىمي تاعىلىمدامادان ءوتۋى ءۇشىن كونكۋرستىق راسىمدەر جۇرگىزىلۋدە.

سونىمەن قاتار, "جاس عالىم" جاس عالىمدارعا قوسىمشا 1000 گرانت بولىنەدى. جەر قويناۋىن پايدالانۋشىلاردىڭ كىرىسىنىڭ 1%-ىن عىلىم مەن تەحنولوگيالاردى دامىتۋعا اۋدارۋ جونىندەگى نورمانى ءتيىمدى ىسكە اسىرۋ بويىنشا جۇمىس جۇرگىزىلەتىن بولادى. جۋرناليستەردىڭ وقۋ ماتەريالىنىڭ مازمۇنىنىڭ ساپاسىزدىعىنا قاتىستى ساۋالىنا جاۋاپ بەرە وتىرىپ, ا. ايماعامبەتوۆ بۇگىنگى تاڭدا  وقۋلىقتاردى دايىنداۋدىڭ بىرنەشە كەزەڭنەن تۇراتىن جاڭا تۇجىرىمداماسى ازىرلەنگەنىن جەتكىزدى. بۇل باسپا ىشىلىك, سىرتقى, قوعامدىق ساراپتاما جانە اپروباتسيا.

"قولدانىستاعى جۇيەدە بەلگىلى ءبىر كەمشىلىكتەر بولدى, مەملەكەت باسشىسىنىڭ تاپسىرماسى بويىنشا ءبىز وقۋلىقتاردى باسىپ شىعارۋعا دايىنداۋ ەرەجەلەرىن تولىعىمەن قايتا قارادىق. قازىرگى ۋاقىتتا ەرەجەلەر وزگەرتىلدى, بۇل مۇلدەم جاڭا فورمات. ەندى جاڭا بۋىن كىتاپتارى جاڭا تالاپتارعا ساي شىعادى, ەندى قاتەلەر بولمايدى", — دەدى مينيستر.

ونىڭ ايتۋىنشا, وقۋلىقتاردى جاپپاي تيراجداۋعا دەيىن كەم دەگەندە ءبىر جىل ىشىندە اپروباتسيا جۇرگىزىلۋى ءتيىس.

ء"بىز جاڭا فورمانى ەنگىزدىك, ەگەر باسپانىڭ ولقىلىعى انىقتالسا, وقۋلىقتاردى قايتا باسىپ شىعارۋدى باسپالار ءوز ەسەبىنەن جۇزەگە اسىرادى. قازىرگى ۋاقىتتا ءبىز اۆتورلاردى دايىنداپ جاتىرمىز, ويتكەنى بۇل تۇتاس ءبىر عىلىم, كوپ نارسە وقۋ ماتەريالىن قۇراستىرىپ, دايىنداۋعا بايلانىستى", — دەدى ا. ايماعامبەتوۆ.  

سونداي-اق ءبىلىم جانە عىلىم ءمينيسترى كوروناۆيرۋس ينفەكتسياسىنا قارسى قازاقستاندىق ۆاكتسينانى دايىنداۋ تۋرالى ايتتى. 

"اعىمداعى جىلدىڭ ناۋرىز ايىنىڭ سوڭىندا ءبىز پاتولوگيالىق ماتەريال الدىق, اعىمداعى جىلدىڭ 15 مامىرىندا ءبىزدىڭ عالىمدار كانديداتتىق ۆاكتسينانى دايىنداپ, ددسۇ-عا جىبەردى, تىزىمگە ەنگىزدى. ال تامىز ايىنىڭ سوڭىندا ددسۇ ءبىزدىڭ ۆاكتسينانى كلينيكالىق سىناقتارعا جىبەردى, كانديداتتىق ۆاكتسينالار تىزىمىنە ەنگىزدى, ەكى پلاتفورمادا كانديداتتىق ۆاكتسينالار دايىن, كلينيكاعا دەيىنگى سىناقتار ءساتتى ءوتتى, تەكسەرۋ بارلىق دەرەكتەردىڭ تولىق كوبەيۋىن كورسەتتى. انتيدەنەلەر بويىنشا ءبىز نە بارىن كورىپ وتىرمىز, يفا بويىنشا وتكىر فازادا اناليز جۇرگىزدىك, IgM جانە IgG بويىنشا انتيدەنەلەر شەتەلدىك انالوگتارىنان كەم تۇسپەيدى. بىراق انتيدەنەلىك جاۋاپتان باسقا, ءبىز گۋمورالدى جانە انتيجاسۋشالىق يممۋنيتەتتىڭ دامۋىن كورىپ وتىرمىز, بۇل دا وتە ماڭىزدى", — دەدى ا. ايماعامبەتوۆ. 

ونىڭ ايتۋىنشا, قازاقستاندىق عالىمدار وتاندىق ۆاكتسينانىڭ كلينيكالىق سىناقتارىنىڭ ءبىرىنشى كەزەڭىنە كىرىسۋدە. ەرىكتىلەردى قابىلداۋ جۇرگىزىلۋدە.