اسقار مامين: بيىل "تالدىقورعان – وسكەمەن" اۆتوجولى پايدالانۋعا بەرىلەدى

شىعىس قازاقستان وبلىسىندا اسقار مامين "وسكەمەن – تالدىقورعان" اۆتوجولىنىڭ قۇرىلىسى جوباسىنىڭ ىسكە اسىرىلۋىن تەكسەردى, ونىڭ جالپى ۇزىندىعى بويىنشا (768 كم) وسى جىلدىڭ سوڭىنا دەيىن قوزعالىستى اشۋ جوسپارلانىپ وتىر. سونىمەن قاتار "قالباتاۋ – مايقاپشاعاي" تاس جولى رەكونسترۋكتسيالانىپ جاتىر, وندا جىل سوڭىنا قاراي اۆتوجولدىڭ بارلىق 415 شاقىرىمىندا قوزعالىس اشىلادى.

الماتى وبلىسىندا ۇكىمەت باسشىسىنا ۇزىندىعى 314 شاقىرىم بولاتىن "وسكەمەن – تالدىقورعان" اۆتوجولىنىڭ شىعىس ۋچاسكەسىن رەكونسترۋكتسيالاۋ جۇمىستارى, ۇزىندىعى 180 شاقىرىم بولاتىن ء"ۇشارال – دوستىق" اۆتوجولىن سالۋ جوباسى تۋرالى باياندالدى.

پرەمەر-مينيستر شىعىس قازاقستان جانە الماتى وبلىستارىنىڭ جولدارى بويىنشا قۇرىلىس جۇمىستارىنىڭ قارقىنىن كۇشەيتۋدى تاپسىردى. سونىمەن قاتار ۇكىمەت باسشىسى كولىك ينفراقۇرىلىمىنىڭ ساپاسىن قامتاماسىز ەتۋ مەن ونى بيىل پايدالانۋعا بەرۋدىڭ ماڭىزدىلىعىن اتاپ ءوتتى.

ينسپەكتسيالانعان ينفراقۇرىلىمدىق جوبالاردى ىسكە اسىرۋ كولىك سالاسىن دامىتۋ ءۇشىن قوسىمشا مۇمكىندىكتەر بەرەدى. "ورتالىق – وڭتۇستىك" باعىتىن ترانزيتتىك ءدالىز رەتىندە تانىتۋ قوزعالىس قارقىندىلىعىن ارتتىرۋعا ىقپال ەتەدى جانە كەلەشەكتە ەكونوميكا ءوسىمىنىڭ جاڭا كوزى بولا الادى. رەكونسترۋكتسيا قوزعالىس قاۋىپسىزدىگىن ارتتىرادى, ەلدى مەكەندەر مەن اۆتوجولدارعا ىرگەلەس جاتقان اۋماقتاردىڭ ەكولوگيالىق جاعدايىن جاقسارتادى, سونداي-اق جاڭا جۇمىس ورىندارىن قۇرا وتىرىپ, جول بويىنداعى سەرۆيستى دامىتۋدى ىنتالاندىرادى.

ۇكىمەت باسشىسى ساپار اياسىندا دەنساۋلىق ساقتاۋ, مادەنيەت جانە سپورت نىساندارىنىڭ جۇمىسىمەن, سونداي-اق وسكەمەن, تالدىقورعان جانە اياگوز قالالارىنىڭ ينجەنەرلىك جانە تۇرعىن ءۇي ينفراقۇرىلىمىنىڭ قۇرىلىسىمەن تانىستى. بۇعان قوسا الماتى وبلىسى كوكسۋ اۋدانى بالپىق بي اۋىلىنداعى ءسۇت-تاۋار فەرماسىنا, "KEMONT" اق ەلەكتر تەحنيكالىق جابدىقتارىن وندىرەتىن قر ءىرى كاسىپورنىنا, "ۆوستوك-مولوكو" كورپوراتسياسىنىڭ ءسۇت زاۋىتىنا, "Ost Fish" بەكىرە تۇقىمداس بالىقتاردىڭ ۋىلدىرىعى مەن ەتىن وندىرەتىن كومپانياعا باردى.