"Toyota Tsusho Corporation" كومپانياسىنىڭ ۆيتسە-پرەزيدەنتى حيدەكي ياناسەنى تيۋبۋ ايماعىنداعى قازاقستاننىڭ قۇرمەتتى كونسۋلى ەتىپ تاعايىنداۋ ءراسىمى ءوتتى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
قازاقستاننىڭ جاپونياداعى ەلشىسى ەرلان باۋداربەك-قوجاتاەۆ حيدەكي ياناسەگە كونسۋلدىق پاتەنتتى تابىس ەتتى.
ءىس-شارا بارىسىندا قول قويىلعان كەلىسىمگە سايكەس, قۇرمەتتى كونسۋلدىق ەكىجاقتى ىسكەرلىك قاتىناستاردى نىعايتۋعا جانە مادەني-گۋمانيتارلىق بايلانىستاردى دامىتۋعا باسا نازار اۋدارادى.
"Toyota Tsusho Corporation" باس كەڭسەسى ەلدىڭ وزىق يندۋستريالىق حابى جانە وندىرىستىك بازاسى سانالاتىن تيۋبۋ ءوڭىرىنىڭ اكىمشىلىك ورتالىعى - ناگويا قالاسىندا ورنالاسقان. اۆتوموبيل جاساۋ, ماشينا جاساۋ, مەتالل وڭدەۋ جانە ەلەكتروتەحنيكا سياقتى كوپتەگەن سالالارعا نەگىزدەلگەن ايماقتىڭ ەكونوميكاسى جاپونيا ءجىو-ءنىڭ شامامەن 20% قۇرايدى.
ءراسىم بارىسىندا ەلشى قول قويىلعان كەلىسىمگە سايكەس قازاقستان مەن جاپونيا اراسىنداعى ينۆەستيتسيالىق ىنتىماقتاستىقتى جانداندىرۋ بويىنشا بىرقاتار ناقتى ءىس-شارالار ايقىندالعانىن ايتىپ, ح. ياناسەنىڭ ىسكەرلىك قاسيەتتەرى مەن جۇمىس تاجىريبەسى قر قۇرمەتتى كونسۋلى قىزمەتىن لايىقتى اتقارۋعا مۇمكىندىك بەرەتىنىن اتاپ ءوتتى.
ءوز كەزەگىندە قۇرمەتتى كونسۋل ءوڭىردىڭ الەۋەتىن ەسكەرە وتىرىپ, جاپونيا مەن قازاقستان اراسىنداعى ينۆەستيتسيالىق جانە تەحنولوگيالىق ىنتىماقتاستىقتى دامىتۋعا كۇش-جىگەرىن سالاتىنىن راستادى.
قازىرگى ۋاقىتتا جاپونيادا كيۋسيۋ, كانساي جانە تيۋبۋ ايماقتارىندا ەلىمىزدىڭ ءۇش قۇرمەتتى كونسۋلدىعى جۇمىس ىستەيدى.
كوروناۆيرۋس ىندەتىنىڭ اسەرىنە قاراماستان, اعىمداعى جىلعى قاڭتار-ماۋسىم ارالىعىندا قر مەن جاپونيا اراسىنداعى ەكىجاقتى تاۋار اينالىمى 805 ملن. اقش دوللارىن قۇراپ, 2019 جىلعى دەڭگەيدە بولدى. ال قازاقستاندىق ەكسپورت 550 ملن. اقش دوللارىنا جەتىپ, وتكەن جىلدىڭ سايكەس كەزەڭىمەن سالىستىرعاندا 16%-عا ءوستى.
"Toyota Tsusho Corporation" قىزمەتىنىڭ نەگىزىن اۆتوموبيل جاساۋ جانە ماشينا جاساۋ, سونداي-اق مەتالل, ەنەرگورەسۋرس, حيميا جانە ەلەكترونيكا ونىمدەرىمەن ساۋدا جاسايتىن جاھاندىق كومپانيا.