مەملەكەت باسشىسى ق.توقاەۆتىڭ حالىققا جولداۋى قوعامدا قوردالانعان كوپ ماسەلەنى شەشۋدىڭ وڭتايلى جولدارىن ۇسىنۋىمەن ەرەكشەلەنەدى دەپ ويلايمىن.
بۇگىندە مەملەكەتتىك باسقارۋ ىسىندەگى ەڭ وزەكتى پروبلەما سىبايلاس جەمقورلىق ەكەنى ەشكىمگە جاسىرىن ەمەس. وسى جەمقورلىقتىڭ سالدارىنان قازىنانىڭ قىرۋار قارجىسى ۇستاعاننىڭ قولىندا كەتىپ, جوسپارلانعان كوپ شارۋالار جۇزەگە اسپاي, اسسا دا ساپاسى سىن كوتەرمەي جاتقان جايى بار. بۇل رەتتە پرەزيدەنت سىبايلاس جەمقورلىقتىڭ الدىن الۋعا باسىمدىق بەرە وتىرىپ, بۇل ىستە قوعامدىق باقىلاۋدىڭ ءرولى ەرەكشە ەكەنىنە توقتالدى.
«سىبايلاس جەمقورلىقپەن كۇرەس بارىنشا جۇيەلى سيپات الۋدا. جەمقورلىقتىڭ پايدا بولۋ سەبەپتەرىنە كوبىرەك نازار اۋدارىلىپ, الدىن الۋ جۇمىستارى جۇرگىزىلۋدە. ەندى, جەمقورلىققا اپاراتىن فاكتورلاردى انىقتاۋ ءۇشىن مەملەكەتتىك ورگاندار مەن كۆازيمەملەكەتتىك سەكتوردىڭ نورماتيۆتىك اكتىلەرمەن جۇمىس ۇدەرىسىنە جەمقورلىققا قارسى كۇرەس تۇرعىسىنان ارنايى تالداۋ جۇرگىزگەن ءجون», دەدى پرەزيدەنت.
پرەزيدەنتتىڭ بۇل رەتتە سىبايلاس جەمقورلىقپەن كۇرەس مەملەكەتتىك اپپاراتتا نەگىزسىز جالتاقتىق پەن باستاماشىلدىقتان قاشقاقتاۋعا سەبەپ بولماۋى كەرەگىن دە اتاپ ءوتتى.
«سىبايلاس جەمقورلىقپەن كۇرەس جاۋاپقا تارتۋدان قورىققان شەنەۋنىكتەردى دەربەستىك, باستاماشىلدىق جانە جەدەل ارەكەت ەتۋ قاتەرىنەن ايىرماۋعا ءتيىس. ءبىز مەملەكەتتىك باقىلاۋعا بالاما رەتىندە قوعامدىق باقىلاۋ ينستيتۋتىن قولداي وتىرىپ, ءتيىستى قۇقىقتىق نەگىز قالىپتاستىرۋىمىز كەرەك», دەدى ول.
وسىعان بايلانىستى مەملەكەتتىك ورگانداردىڭ, كۆازيمەملەكەتتىك سەكتوردىڭ قوعام الدىنداعى اشىقتىعىن جانە ەسەپتىلىگىن قامتاماسىز ەتۋگە جول اشاتىن قوعامدىق باقىلاۋ تۋرالى زاڭدى ازىرلەپ, قابىلداۋدى تاپسىردى.
«قوعامدىق كەڭەستەردىڭ ءرولىن ارتتىرا ءتۇسۋ كەرەك. ولاردى ساتىپ الۋدى ۇيىمداستىراتىن كوميسسيالاردىڭ جۇمىسىنا تارتۋ قاجەت. سونداي-اق كۆازيمەملەكەتتىك سەكتوردا قوعامدىق كەڭەس قۇرۋ مۇمكىندىگىن قاراستىرۋ كەرەك. پارلامەنت قارالىمىنداعى ءتيىستى زاڭ جوباسىن جىل اياعىنا دەيىن قابىلداعان ءجون. سونىمەن قاتار قوعامدىق كەڭەستەردىڭ قۇرامىنا ءتۇرلى الەۋمەتتىك توپ وكىلدەرىن كەڭىنەن تارتۋ كەرەك. مىسالى, ءبىز مۇمكىندىگى شەكتەۋلى ادامدار وسىنداي ۇيىمداردىڭ جۇمىسىنا ارالاسىپ, ءوز ۇندەرىن جەتكىزۋ ءۇشىن قولايلى جاعداي جاساۋىمىز قاجەت. ولار ارقاشان مەملەكەتتىڭ ەرەكشە نازارىندا بولۋعا ءتيىس», دەدى ق.توقاەۆ.
پرەزيدەنتتىڭ بۇل باستاماسى ەڭ الدىمەن جەمقورلىقتىڭ سالدارىمەن ەمەس, ونى تۋعىزاتىن سەبەپتەردى ەرتە انىقتاپ, مەملەكەت دامۋىن تەجەيتىن جەگى قۇرتتى ەرتە جويۋدى كوزدەيدى. ارينە, بۇل ايتىلعانداردى جۇزەگە اسىرۋدا ءاربىر قازاقستاندىقتىڭ, ازاماتتىق قوعام ينستيتۋتتارىنىڭ دە بەلسەندىلىگى اۋاداي قاجەت.
دارحان مۇحان,
جۋرناليست, جەزقازعان قالاسى قوعامدىق كەڭەسىنىڭ مۇشەسى
قاراعاندى وبلىسى