شەنەۋنىكتەردىڭ زاڭسىز بايىعانى ءۇشىن ازاماتتىق-قۇقىقتىق جاۋاپكەرشىلىك ەنگىزىلەدى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ ءوزىنىڭ Facebook پاراقشاسىندا جازدى, دەپ حابارلايدى Egemen.kz
"دوستار, وزدەرىڭىزگە بەلگىلى, سىبايلاس جەمقورلىققا قارسى كۇرەستى كۇشەيتۋ – مەملەكەت باسشىسى ساياساتىنىڭ باستى باعىتتارىنىڭ ءبىرى. قازىرگى تاڭدا ۇكىمەتپەن بىرلەسىپ, ەىدۇ, گرەكو, بۇۇ ۇسىنىمدارىنان تۋىندايتىن سىبايلاس جەمقورلىققا قارسى باستامالار پىسىقتالدى. ولاردىڭ نەگىزگىسى – شەنەۋنىكتەردىڭ زاڭسىز بايىعانى ءۇشىن ازاماتتىق-قۇقىقتىق جاۋاپكەرشىلىكتى ەنگىزۋ", دەيدى اليك شپەكباەۆ.
اليك شپەكباەۆتىڭ ايتۋىنشا, 2021 جىلدان باستاپ جالپىعا بىردەي دەكلاراتسيالاۋدىڭ ءبىرىنشى كەزەڭىن ىسكە قوسىپ, كەلەسى تەتىكتى ۇسىنىلادى. باستاپقى كىرىس دەكلاراتسياسىندا مەملەكەتتىك قىزمەتشى ءوزىنىڭ بارلىق اكتيۆتەرىن تىركەيدى. ەگەر كەزەكتى دەكلاراتسيانى تاپسىرۋ كەزىندە ونىڭ نەگىزدەي المايتىن تابىسىنىڭ ەداۋىر ءوسۋى انىقتالسا, وعان مەملەكەتتىك قىزمەتتەن بوساتۋ جانە نەگىزسىز اسىپ كەتكەن سومانى تاركىلەۋ شاراسى قولدانىلاتىنىن اتاپ ءوتتى.
– دامىعان ەلدەردە قولدانىلاتىن كاسىبي ساتىلماۋشىلىققا تەكسەرۋ ينستيتۋتىن ەنگىزۋ ءبىرشاما الدىن الۋ اسەرىن بەرەتىن بولادى. سونداي-اق, كۇن تارتىبىندە مەملەكەتتىك قىزمەتشى ەمەس, بىراق جاريالىق مىندەتتەردى ورىندايتىن تۇلعالارعا سىبايلاس جەمقورلىققا قارسى زاڭنامانى قولدانۋ ماسەلەسى دە بار. ياعني, ءبىز پارا العانى ءۇشىن كوممەرتسيالىق بانكتەردىڭ توپ-مەنەدجەرلەرىن, تابيعي مونوپوليالار سۋبەكتىلەرىنىڭ باسشىلارىن, جەكە سوت ورىنداۋشىلارىن جانە جاريا قىزمەتشىلەردىڭ باسقا ساناتتارىن مەملەكەتتىك قىزمەتشىلەر سىندى قىلمىستىق جاۋاپكەرشىلىككە تارتۋدى ۇسىنامىز. بۇل تاجىريبە بۇكىل الەمدە كەڭ تارالعان, – دەيدى سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى.
سونداي-اق ول قوعامنىڭ سىبايلاس جەمقورلىقتى بارىنشا ازايتۋعا دەگەن تالپىنىسى بۇرىنعىدان دا زور. سوندىقتان جەمقورلىققا قارسى كەشەندى رەفورمالاردىڭ وزەكتىلىگىن اسىرا باعالاۋ مۇمكىن ەمەستىگىن تىلگە تيەك ەتتى.
"ەلباسى مەن مەملەكەت باسشىسىنىڭ تولىق قولداۋىنا يە بولا وتىرىپ, ءبىز الدىمىزعا قازاقستاندا سىبايلاس جەمقورلىققا قارسى ەڭ پارمەندى قۇرالداردى ەنگىزۋ ماقساتىن قويامىز. بۇل – ەكونوميكالىق ءوسۋ مەن ازاماتتاردىڭ ءال-اۋقاتىن ارتتىرۋدىڭ نەگىزگى شارتى", دەيدى اليك شپەكباەۆ.