مەملەكەت باسشىسى «جاڭا جاعدايداعى قازاقستان: ءىس-قيمىل كەزەڭى» اتتى بۇگىنگى جولداۋىندا مەديتسينا قىزمەتكەرلەرىن قولداۋ باعىتىندا كوپ باستامالار كوتەردى.
پرەزيدەنت قاسىم-جومارت توقاەۆتىڭ حالىققا ارناعان جولداۋىندا اتاپ كورسەتىلگەندەي, 2023 جىلى دارىگەرلەردىڭ جالاقىسى ەلىمىزدەگى ورتاشا جالاقىدان 2 ەسە جوعارى بولادى. بيىلعى ءىى جارتىجىلدىقتا پاندەميامەن كۇرەسكەن مەديتسينا سالاسىنىڭ ماماندارىنا كوتەرمەلەۋ رەتىندە قازىنادان 150 ملرد تەڭگە قوسىمشا قاراجات بولىنەدى. ال 2025 جىلعا قاراي ەلىمىز بويىنشا 20 زاماناۋي مەديتسينالىق ورتالىق سالىنادى. سونىمەن بىرگە ىندەت كەزىندە اسا قاجەتتىلىك تۋدىرعان ەپيدەميولوگ, رەانيماتولوگ, پۋلمانولوگ, ينفەكتسيونيست, كارديولوگ سىندى ماماندار دايارلاۋعا كوبىرەك كوڭىل بولىنبەك. مەملەكەت حالىقتىڭ ورتاشا ءومىر ءسۇرۋ ۇزاقتىعىن 75 جاسقا ۇلعايتۋدى قولعا الادى. سونىمەن قاتار شالعايداعى اۋىلداردا حالىقتىڭ دەنساۋلىعىن جاقسارتۋ ماقساتىندا ترانسپورتتىق مەديتسينانى دامىتۋ جۇزەگە اسىرىلادى.
وسىناۋ يگىلىكتەر كەلەشەكتە وتاندىق دەنساۋلىق ساقتاۋ سالاسىن ورگە باستىرادى دەگەن ويدامىز. جالپى, مەديتسينانىڭ ۇلت بولاشاعىندا ماڭىزدى ءرول وينايتىنىن پاندەميا انىق كورسەتىپ بەردى. سوندىقتان پرەزيدەنتتىڭ جولداۋدا بۇل سالاعا ايرىقشا توقتالۋى ەلدىڭ كەلەشەگىنە دەگەن قامقورلىقتى بىلدىرەدى.
گۇلنار قۇرمانبەكوۆا,
شىمكەنت قالالىق جەدەل جاردەم ستانساسىنىڭ باس دارىگەرى
شىمكەنت