بۇگىن ءبىلىم كۇنى مەرەكەسىنە وراي, جامبىل وبلىسى, جامبىل اۋدانىنىڭ تۇركسىب اۋىلىندا №6 مەكتەپ-گيمنازياسى پايدالانۋعا بەرىلدى. جامبىل وبلىسىنىڭ اكىمى بەردىبەك ساپارباەۆ جاڭا ءبىلىم وشاعىنداعى العاشقى شاراعا قاتىسىپ, مۇعالىمدەردى, وقۋشىلار مەن اتا-انالاردى جاڭا وقۋ جىلىنىڭ باستالۋىمەن قۇتتىقتادى, دەپ حابارلايدى Egemen.kz.
كارانتيندىك شەكتەۋلەرگە بايلانىستى اتالعان ءىس-شاراعا تەك ءبىرىنشى سىنىپ وقۋشىلارى مەن مەكتەپ ءبىتىرۋشى تۇلەكتەر عانا قاتىستى. سونىمەن قاتار, اكىم ەلىمىز تاۋەلسىزدىك العان كۇننەن باستاپ جاستاردىڭ ساپالى ءبىلىمى مەن سانالى تاربيەسىنە ۇلكەن كوڭىل ءبولىنىپ وتىرعانىن, جىل سايىن ءبىلىم كۇنى قارساڭىندا جاڭا مەكتەپتەر اشىلۋدا ەكەنىن اتاپ ءوتتى. ال, اتا-انالار مەن مۇعالىمدەر جاڭا تەحنولوگيامەن جابدىقتالعان مەكتەپكە كوڭىلى تولىپ, ءوز ريزاشىلىقتارىن ءبىلدىردى. ءبىلىم وشاعى زاماناۋي روبوتوتەحنيكا كابينەتىمەن, لينگافون جانە مۋلتيمەديا بولمەلەرى, كەڭ اكت جانە سپورت زالدارىمەن, كىتاپحانا, اسحانا, تىگىن جانە اعاش شەبەرحانالارىمەن قامتىلعان. مەكتەپ ەكى اۋىسىمدا 600 وقۋشىعا ءبىلىم بەرۋگە ارنالعان. بالالاردىڭ قاۋىپسىزدىگى ءۇشىن 20 بەينەباقىلاۋ كامەراسى ورناتىلعان.
بەردىبەك ساپارباەۆ جاڭا مەكتەپتە جوعارى سىنىپ وقۋشىلارىنا ارناپ العاشقى ساباق وتكىزدى. وعان ونلاين-رەجيمدە جامبىل اۋدانىنىڭ تاعى دا بىرنەشە مەكتەبى قوسىلدى. اكىم ساباق بارىسىندا قوعامداعى بەيبىتشىلىك پەن كەلىسىمدى نىعايتۋداعى جاس ۇرپاقتىڭ ءرولىن, بالالاردى ۇلتتىق ءداستۇر نەگىزىندە تاربيەلەۋدىڭ ماڭىزدىلىعىن باسا ايتتى. "دوستىق پەن ءوزارا تۇسىنىستىك – ءبىزدىڭ باستى بايلىعىمىز. بىرلەسكەن كۇش-جىگەرىمىزدىڭ ارقاسىندا عانا ءبىز وسى جىلدار ىشىندە بار جيعانىمىز بەن جەتكەن جەتىستىكتەرىمىزدى ساقتاي الامىز. بۇل ورايدا جاس ۇرپاققا ۇلكەن جاۋاپكەرشىلىك جۇكتەلگەن. بىرلىك – تۇراقتىلىقتىڭ نەگىزى. بەيبىتشىلىك پەن كەلىسىم سالتانات قۇرعان مەملەكەت قانا داميدى", دەدى ول. ول ءۇشىن بالالاردىڭ بويىندا ەرتە جاستان وتانعا دەگەن سۇيىسپەنشىلىكتى قالىپتاستىرىپ, اتا-بابامىزدىڭ باي تاريحى مەن مادەني مۇراسى تۋرالى ۇنەمى اڭگىمەلەپ وتىرۋ كەرەكتىگىن دە جەتكىزدى. ساباق بارىسىندا وقۋشىلار اكىمگە قاشىقتىقتان وقىتۋداعى ءتۇرلى ماسەلەلەرگە قاتىستى ساۋالدار جولداپ, جاۋاپ الدى.
بەردىبەك ساپارباەۆ ءوز سوزىندە 23 مىڭنان استام جامبىلدىق وقۋشى وقۋلارىن ءداستۇرلى فورماتتا جالعاستىراتىن اتاپ ءوتتى. مەملەكەت باسشىسىنىڭ قازاقستان حالقىنا جولداۋىندا ايتىلعان تاپسىرمالاردى جۇزەگە اسىرۋ اياسىندا دا مەكتەپتەردى كۇندىزگى وقىتۋعا قايتارۋ بويىنشا جۇمىستار جۇرگىزىلۋدە ەكەنىن اتاپ ءوتتى. سونىمەن قاتار, بالالار اكىمنەن قازىر قانداي ماماندىقتار سۇرانىسقا يە ەكەنىن سۇرادى. ءوز جاۋابىندا اكىم بۇگىندە وڭىردە قۇرىلىسشىلار, IT جانە اۋىلشارۋاشىلىعى ماماندارى جەتىسپەيتىنىن, سونداي-اق, ارا, بالىق شارۋاشىلىعىن جانە جەمىس-جيدەك كلاستەرىن دامىتاتىن ماماندار قاجەتتىگىن دە ايتتى.
جامبىل وبلىسى