پارلامەنت سەناتىنىڭ دەپۋتاتى دانا نۇرجىگىت مەملەكەت باسشىسىنىڭ بۇگىنگى جولداۋىنا قاتىستى ءوز پىكىرىن ءبىلدىردى, - دەپ حابارلايدى Egemen.kz.
ء"بىز تاۋەلسىز قازاقستاننىڭ تاعدىرى تاريح تارازىسىنا تۇسكەن سىن كەزەڭدە ءومىر ءسۇرىپ جاتىرمىز. سوندىقتان قازاقستان حالقىنىڭ ساناسىندا سەرپىلىس جاسالۋى كەرەك. پرەزيدەنت ءوزىنىڭ جولداۋىندا وسى ويدى جەتكىزگىسى كەلدى.
باستىسى وسى سىناق كەزەڭىندە ەڭ باستى ماقساتتارىمىزدان اينىماۋىمىز كەرەك. ماقساتى بار ادامدا جىگەر مەن قايرات تا بولادى.
پاندەميا كەزىندەگى تاعى ءبىر ماسەلە – ينفودەميا. وسى كەزەڭدە دەموكراتيانىڭ ورنىنا حايپوكراتيا كەلدى. مىنە سول حايپوكراتيانىڭ جولىندا كەتپەي, ءوزىمىزدىڭ باستى ماقساتىمىزدان جاڭىلماي العا ءجۇرۋدى ۇيرەنۋىمىز شارت.
ال پرەزيدەنتتىڭ جولداۋىنان الداعى ۋاقىتتا جاسالاتىن جۇمىس وتە كوپ ەكەنىن تۇسىندىك. بارلىق سالا وزگەرىسكە ۇشىرايدى. سوندىقتان, زامانمەن بىرگە ءجۇرىپ وتىرۋىمىز كەرەك. بيلىك تە, ازاماتتارىمىز دا وسىعان دايىن بولۋى قاجەت.
ول نە ءۇشىن كەرەك؟ پاندەميا كەزىندە ءومىردىڭ بارلىق سالاسىنداعى كەمشىن تۇستار ايقىن كورىندى. سونىڭ ءبارىن رەتتەيتىن باسقا ادامدار ەمەس, ول ءوزىمىز – قازاقستاندىقتار", - دەدى دانا نۇرجىگىت.