قازاقستانداعى 4 646 ەلدى مەكەن كەڭ جولاقتى ينتەرنەتكە قوسىلعان. الايدا 900-گە جۋىق اۋىلدىق جەردە عالامتور جەلىسىنە دەگەن تاپشىلىق ءالى دە بايقالۋدا. بۇل تۋرالى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى تەلەكوممۋنيكاتسيالار كوميتەتىنىڭ توراعاسى ۆيتالي ياروشەنكو ايتتى. ۆەدومستۆو جىل سوڭىنا دەيىن اۋىلدا تۇراتىن 99,3% پايىز حالىقتى قاجەتتى بايلانىس جەلىسىمەن قامتۋدى كوزدەمەك.
توبج تەحنولوگياسى قولدانىلادى
كوميتەت توراعاسىنىڭ ايتۋىنشا, قازىر كەڭ جولاقتى ينتەرنەتكە 6 459 ەلدى مەكەننىڭ ىشىندە 4 646-سى قوسىلعان. بۇل رەتتە وسى ەلدى مەكەندەردە 18,2 ملن ادام, ياعني حالىقتىڭ 97,3%-ى تۇرادى.
«Nur Otan پارتياسىنىڭ سايلاۋالدى تۇعىرناماسىنا سايكەس جىل سوڭىنا دەيىن 250 جانە ودان دا كوپ ادام تۇراتىن بارلىق اۋىلدىق جەردى ينتەرنەتپەن قامتاماسىز ەتۋ مىندەتى قويىلدى. قازىر 883 اۋىلدا ينتەرنەت جوق. وسى ولقىلىقتىڭ ورنىن تولتىرۋ ءۇشىن ەكى جوبا جۇزەگە اسىرىلۋدا. بىرىنشىسىنە كەلسەك, تالشىقتى-وپتيكالىق بايلانىس جەلىسى (توبج) تەحنولوگياسى نەگىزىندە ايماقتاردى كەڭ جولاقتى ينتەرنەتكە قوسۋ جوسپارلانىپ وتىر», دەدى ۆ.ياروشەنكو.
مەملەكەتتىك ورگاندارعا باسىمدىق بەرىلەدى
وسى جوبانىڭ اياسىندا مەملەكەت اۋىلدى ەلدى مەكەندەردەگى مەكتەپ, اۋرۋحانا جانە اكىمدىكتەرگە ارنالعان كەڭ جولاقتى ينتەرنەت قىزمەتىن ساتىپ الماق. جىلدىڭ سوڭىنا دەيىن وسى ارقىلى 1 257 اۋىلداعى 3 718 مەملەكەتتىك ورگاندى قاجەتتى ينفراقۇرىلىممەن قامتۋ كوزدەلگەن.
«جىلدىڭ باسىندا ۇيالى بايلانىس وپەراتورلارى مەن ءبىزدىڭ مينيسترلىك اراسىندا مەموراندۋمعا قول قويىلىپ, سول بويىنشا ۇيالى بايلانىس وپەراتورلارى جوبانى اياقتاۋعا جانە 250-دەن استام ادام تۇراتىن بارلىق اۋىلدى 3G نەمەسە 4G قىزمەتتەرىمەن قامتاماسىز ەتۋ مىندەتىن الدى. اتالعان جوبا ارقىلى 46 اۋىل قامتىلىپ, قالعان 882 ەلدى مەكەنگە ينتەرنەت جىلدىڭ اياعىنا دەيىن جەتۋى ءتيىس», دەدى تەلەكوممۋنيكاتسيا كوميتەتىنىڭ توراعاسى.
كەڭ جولاقتى ينتەرنەتتەن تارشىلىق كورمەيدى
ۆەدومستۆو وكىلىنىڭ سوزىنە سەنسەك, ەكىنشى توقساننىڭ اياعىنا دەيىن حالىقتىڭ 99,3%-ى كەڭ جولاقتى ينتەرنەتتەن تارشىلىق كورمەيتىن بولادى. سونىمەن قاتار 250-گە جەتپەيتىن اۋىلدىق ايماق حالقىنىڭ ماسەلەسى دە قاراستىرىلىپ جاتىر.
ء«بىزدىڭ ۆەدومستۆو ۇلتتىق ەكونوميكا مينيسترلىگى جانە اكىمدىكتەرمەن بىرلەسىپ تالداۋ جۇرگىزدى. بۇگىندە 243 ەلدى مەكەن ىرىكتەلىپ الىندى, وندا كەڭ جولاقتى ينتەرنەت جەلىسىن قويۋ جۇمىستارى پىسىقتالۋدا. جاڭا وقۋ جىلىنا توقتالساق, ءبىز ارنايى جۇمىس جۇرگىزدىك. ينتەرنەتكە بايلانىستى پروبلەماسى بار مەكتەپتەر مەن عالامتورعا مۇلدەم قوسىلماعان اۋىلدار ساباقتى ادەتتەگى رەجىمدە جالعاستىرادى», دەدى ۆ.ياروشەنكو.
9 مىڭ شاقىرىم جەلى سالىندى
«قازاقتەلەكوم» اق باسقارما توراعاسى قۋانىشبەك ەسەكەەۆ بيىل ەلىمىزدە 9 مىڭ شاقىرىمدى قۇرايتىن تالشىقتى-وپتيكالىق بايلانىس جەلىسى سالىنعانىن جانە وعان 828 اۋىلدى قوسۋ جوسپارلانىپ وتىرعانىن ايتتى.
«بيىل ناۋرىز-ءساۋىر ايلارىندا ءبىزدىڭ بايلانىس ورتالىعىنىڭ جۇكتەمەسى ارتتى. ينتەرنەت ارقىلى تاۋلىگىنە 2,5 مىڭنان استام ءوتىنىش بەرىلدى. ابونەنتتەردىڭ نەگىزگى بولىگى ينتەرنەتكە قوسىلادى. بيىل شامامەن 9 مىڭ شاقىرىمعا جۋىق تالشىقتى-وپتيكالىق بايلانىس جەلىسىن سالىپ, وعان ەلىمىزدەگى 828 اۋىلدى قوسۋ جوسپارلانىپ وتىر. وندا شامامەن 2 مىڭ مەملەكەتتىك مەكەمە, ونىڭ ىشىندە اكىمدىكتەر, اۋرۋحانالار, مەكتەپتەر ورنالاسقان. وپتيكالىق تالشىقتىڭ كەلۋىمەن ءبىزدىڭ ءموبيلدى بايلانىس جەلىسى دە اۋىلعا كەلەدى. اۋدان ورتالىقتارىنىڭ, اۋىلدىق ەلدى مەكەندەردىڭ نەگىزگى بولىگى ينتەرنەتكە قوسىلعان. جىل سوڭىنا دەيىن بارلىق اۋىلداردى ينتەرنەتكە قوسامىز», دەدى ق.ەسەكەەۆ.
باسقارما باسشىسىنىڭ ايتۋىنشا, Tele2 جانە Kcell وپەراتورلارى بازالىق ستانسالاردى ورناتۋدى باستادى. كومپانيا ماماندارى ايماقتاردى ارالاپ, جاڭا وقۋ جىلىندا بايلانىس ساپاسىن ارتتىرۋ ءۇشىن قاجەتتى جۇمىستارعا كىرىسكەنىن جەتكىزدى.