2019 جىل. شىلدە ايى. پورتۋگاليا. حالىقارالىق براگا ءتۋرنيرى. 1/4 فينال. قارسىلاس يسپانيادان كەلگەن ازۋلى كوماندا. 1:0 ەسەبىمەن جەڭىسكە جەتتىك. بىراق... مويىنداي الۋ دا ەرلىك قوي, نەگىزى تابلوداعى ەسەپ بويىنشا جەڭگەنىمىزبەن, فۋتبولدا جەڭىلدىك. ياعني, ەشقانداي ويىن كورسەتە المادىق. ال «اتلەتيكو» الەمدىك دەڭگەيدەگى ويىن كورسەتتى.
ويىننىڭ العاشقى مينۋتىندا بالالارىمىز تەك اسپانعا اۋزى اشىلعان كۇيى قاراپ قالدى. سەبەبى «اتلەتيكو» دوپتى جەرگە تۇسىرمەستەن بىردەن شابۋىلعا شىعىپ, قاقپامىزعا بىرنەشە سوققى جاساپ ۇلگەردى. اسپاننان اۋەلەتە كەلگەن الىس پاستاردى كەۋدەسىمەن قاعىپ جىبەرىپ, كەلەسى ويىنشىعا پاس بەرىپ, دوپتى جەرگە تۇسىرمەي شىققان شابۋىلعا قارسى قانداي شارا قولدانا الارىن بىلمەي ءبىراز ساسقالاقتادى. سەبەبى ونداي ويىنعا دايىن ەمەس ەدىك. ويىننىڭ العاشقى مينۋتىندا-اق بىرنەشە نوكداۋن العانداي كۇي كەشىپ قالدىق. ايتەۋىر بالالارىمىز تەزىرەك ەس جيا ءبىلدى. باستان اياق تەك قورعانىستا ويناۋعا ءماجبۇر بولدىق. ياعني, ويىننىڭ كوپ بولىگى ءبىزدىڭ جارتى الاڭدا بولدى. قاقپامىزعا كەمىندە تىكەلەي 20-25 سوققى جاسالدى. ال باعاننىڭ جانىنان پىشاقپەن كەسكەندەي وتكەن سوققىلاردا ەسەپ جوق...
قاقپاشىمىز ەراسىل دا وسال ەمەس ەدى. كوماندامىزداعى باستى سەنىم ارتىپ وتىرعان بالامىز. سول ماتچتا ول ادەتتەگى دەڭگەيىنەن اسىپ, جارقىلداپ تۇردى. ەڭ كوپ جۇمىس, سالماق سوعان ءتۇستى. دوپقا سەكىرەدى, قۇلايدى, قايتا تۇرادى. تىنىم جوق. ءبىر كەزدە ەراسىلدىڭ باسى قاقپانىڭ باعانىنا سوعىلىپ, «توح» ەتكەن داۋىس قاتتى شىقتى. تريبۋنا ورە تۇرەگەلدى. ول جەردە قوزعالماي جاتىر. بارلىعىمىز جانتالاسا جۇگىردىك. جۇرەگىم اۋزىما تىعىلدى. ىشىمنەن ويلادىم ءبارى ءبىتتى دەپ. انانداي سوققىدان نە باس, نە باعان سىنۋى كەرەك ەدى. بارساق, قاقپانىڭ سىزىعىندا دوپتى قۇشاقتاپ العان كۇيى ەراسىل جاتىر. ءبىر كەزدە جان-جاعىنا قارادى دا اتىپ تۇردا. ءبىز اڭ تاڭ. تورەشى دە, دارىگەر دە قايتا-قايتا ء«بارى دۇرىس پا؟» دەپ ونى اينالشىقتاپ تەكسەرىپ جاتىر. ەشقانداي زاقىم جوق.
وسى وقيعا مەن ءۇشىن ءالى جۇمباق. اللا ساقتايمىن دەسە ساقتايدى ەكەن عوي. دوپتى سىزىقتىڭ ۇستىندە ۇستاعاندىقتان گول بولعان جوق. شامامەن 5-6 نە 7-8 سانتيمەتر ىشكە جىلجىعاندا گول سانالار ەدى. ودان بولەك, قاقپانىڭ ۇستىنەن وتكەن سوققىلاردا ەسەپ جوق. ءبىز تەك 2-3 شابۋىل عانا جاسادىق دەپ ويلايمىن. سونىڭ بىرەۋىندە, ءوز جارتى الاڭىمىزدا ولاردان دوپتى الىپ قويعان شابۋىلشىمىز جالعىز ءوزى العا ۇمتىلدى. سەبەبى ءبارى ارتتا ەدى. شامامەن 70-مينۋتتا. جانتالاسىپ كەلە جاتىپ قۇلادى. «قۇلاننىڭ قاسۋىنا, مىلتىقتىڭ باسۋى» دەگەندەي, جالعىز ءوزىنىڭ ابدەن سىلەسى قاتىپ ونسىز دا قۇلاۋعا دايىن تۇرعان شابۋىلشىمىزدان دوپتى الىپ قويا بەرگەندە قۇلاپ, ايىپ جاساعانداي بولىپ كورىندى. بىزگە ايىپ سوققى تەبۋ قۇقىعى بەرىلدى. ايىپ سوققىسى ورىندالدى. دوپ قاز-قاتار قامال بولىپ تۇرعان ويىنشىلاردىڭ اراسىنان, بەل تۇستارىنان ءوتىپ قاقپاعا كىردى. گول. بىراق ءوز كوزىمە ءوزىم سەنە الماي تۇرمىن. ءبىر-بىرىنە جابىسىپ, قامال بولىپ تۇرعان ويىنشىلاردىڭ اراسىنان قالاي ءوتتى؟ قاقپاشى دا اڭ-تاڭ. ەشقانداي ارەكەت جاساي الماي, ورنىندا تۇرىپ قالعان.
بۇل گول بولماعاندا, ءبىز جەڭىلەر ەدىك. سەبەبى بالالارىمىزدىڭ ابدەن سىلەلەرى قاتىپ, شارشاپ قالدى. ادەتتەگى ماتچتاردان 2 ەسە كوپ سالماق ءتۇستى. رەاكتسيا, جىلدامدىق, تەحنيكا, تاكتيكالىق تۇرعىدان, ۇزىن پاستار, بارلىق ولشەمدەر بويىنشا ۇلگەرە الماعان بالالارىمىزدى 2 تايم بويى «اتلەتيكو» قالجىراتىپ جىبەردى. تەحنيكا, تاكتيكا جاعى تۇسىنىكتى, ولارمەن باسەكەلەسە المايمىز. بىراق فيزيكالىق تۇرعىدان توتەپ بەرە الاتىن قاۋقارىمىزعا قاراماستان, تەحنيكا دەگەنىن ىستەتتى. وسىنداي جاعدايدا, قۇداي قاراسقانداي گول بولۋى, بالالارىمىزدى جىگەرلەندىرىپ, كۇش جيناۋىنا سەبەپ بولدى. بالالارىمىزدىڭ ەكىنشى تىنىسى اشىلعانداي قايتا اتقا قوندى. ەۋروپا فۋتبولىندا سوڭعى 10-15 مينۋتتا ويىندارى تۇرلەنىپ, قىزا تۇسسە, بىزدە, كەرىسىنشە, وشە ءتۇسۋشى ەدى عوي. سونداي ساتتە, «اتلەتيكو» ويىندى قىزدىرا ءتۇسىپ, ءبىزدى توپەلەي باستاعان كەزدە بالالارىمىزدىڭ گولمەن رۋحتانعانى ولارعا قارسى قورعانىسىمىزدى قايتا كۇشەيتىپ, توتەپ بەرۋگە سەپتەستى. «قازاق رۋحتانسا, قامال الادى» دەگەن راس ەكەن...
وسى كۇنگە دەيىن ءالى ۇمىتپايمىن, سول كەزدەگى سوڭعى 15 مينۋتتىڭ ءاربىر مينۋتىن, سەكۋندىن قالاي وتكىزگەنىمدى. اينالىپ كەلگەندە بۇكىل كوماندا جانتالاسىپ تاباندىلىق تانىتتى. سوڭعى ىسقىرىق. ماتچ ءبىتتى. اياققا تۇرۋعا شامام كەلمەي, جەرگە قۇلادىم. اسپانعا قاراپ كۇلدىم دە قايتا تۇردىم. ۇياتتان. تورەشىگە, قارسىلاس كومانداعا بارىپ ايتقىم كەلدى «سىزدەر جەڭدىڭىزدەر. جەڭىستى سىزدەرگە قالاي بەرسەم بولادى؟» دەپ. بىراق ەرلىك كورسەتكەن بالالارعا نە ايتامىن؟ بالالاردىڭ دا كىناسى جوق. يسپان بالالارى سەكىلدى ستاندارت الاڭدا جاتتىقپاعان, الەمدىك دەڭگەيدەگى جاتتىقتىرۋشىلاردان ءتالىم الماعان بالالاردىڭ كىناسى نە؟
«اتلەتيكو» جاتتىقتىرۋشىلارىندا ءتۇر جوق. ورىندارىندا قوزعالماي قاتىپ قالعان. قىزارادى, بوزارادى. كوزدەرى باقىرايعان كۇيى تۇر. ءوڭىم بە, ءتۇسىم بە دەگەندەي. مەڭ زەڭ كۇيدە تۇرعانىن بايقادىم. ولار دا جارتىلاي فينالعا وتكىسى كەلەدى دەگەندەي. ونىڭ ۇستىنە فۋتبولى دامىماعان ەلدەن كەلدىك دەپ توبەمىزدەن قارايتىنى بار... بارىپ قولدارىن قىستىم. بالالارىن جۇباتىپ, جىگەرلەندىردىم. مەن ءۇشىن ومىرىمدە ەش ۇمىتىلمايتىن ماتچ وسى بولدى...
فازىلبەك ابساتتار ۇلى