جيدەبايدىڭ ىرگەسىندەگى نايزاتاستا ەسكى تام بار كورىنەدى. جاي تام ەمەس, اباي, تاكەجان, قۇدايبەرگەن, وسپان, ىسقاقتار ءبىلىم العان مەكتەپتىڭ ورنى, دەپ جازادى Egemen.kz
نايزاتاستاعى تامدى قۇنانباي ءوز زامانىندا قىستاق رەتىندە سالدىرعان ەكەن. ۋفادان, بۇقارادان وقۋ-قۇرالدارىن العىزىپ, بالالار قىستاي نوعاي مۇعالىمنەن ءبىلىم العان. سوندا بالالارىنا شىبىق ارتىق ءتيىپ كەتپەسىن دەسە كەرەك, زەرە اجەلەرى مەكتەپتە مەڭگەرۋشى بولىپ جۇمىس ىستەپتى.
بۇل تۋرالى شىعىس قازاقستانعا مەملەكەتتىك حاتشى باستاعان دەلەگاتسيانىڭ وكىلى رەتىندە كەلگەن بەلگىلى اقىن ۇلىقبەك ەسداۋلەت ايتتى.
– ەسكى تامنىڭ ورنىن "اباي العاش ساۋاتىن اشقان جەر" دەپ قايتا قالپىنا كەلتىرسە دۇرىس بولار ەدى. شاكارىم جاتقان قۇدىقتى دا تاريحي نىسانعا اينالدىرىپ, تۋريستەردىڭ نازارىن بۇرساق, – دەيدى ۇلىقبەك ەسداۋلەت.
ارينە, ورىندى ۇسىنىستى مەملەكەت باسشىلارى قولداي جاتار. قۇنانباي اۋلەتىنىڭ ماڭگىلىك مەكەنى, شەجىرەلى اقشوقىنى دا كەشە عانا كولدەنەڭ ماسەلە ەتىپ كوتەرگەن ەدى, كوپ ۇزاماي تاريحي جەرگە اينالدى. قاراۋسىز قالعان قاسقا بۇلاققا دا بۇگىن وتكەن-كەتكەندەر ارنايى توقتاپ ءزام-ءزام سۋىنان ءدام تاتادى, تاسقا قاشالعان ۇلى ابايدىڭ عيبراتتى سوزدەرىن وقيدى. ەرتەڭ-اق "ابايدىڭ العاشقى مەكتەبىن كورەمىز" دەۋشىلەر نايزاتاسقا اعىلىپ بارا جاتار.
مەرەي قاينار ۇلى,
شىعىس قازاقستان وبلىسى