بۇگىنگى كۇنى باستاۋىش سىنىپتاردا 82 مىڭنان استام وقۋشى بار بولسا, ونىڭ 50%-ى كەزەكشى سىنىپتارعا وقۋعا ءوتىنىش بىلدىرگەن.
الداعى وقۋ جىلى وقۋشىلارعا ارنالعان قاشىقتىقتان وقىتۋ فورماتىندا باستالاتىنى بەلگىلى. تەك 1-4 سىنىپتار ءۇشىن اتا-انالاردىڭ ءوتىنىشى نەگىزىندە بالالار سانى 15-تەن اسپايتىن كەزەكشى سىنىپتار جۇمىس ىستەيتىن بولادى. ساباقتىڭ ۇزاقتىعى 40 مينۋتتان, ءار سىنىپتىڭ ءۇزىلىس ۋاقىتى ءارتۇرلى. بۇگىنگى كۇنى باستاۋىش سىنىپتاردا 82 مىڭنان استام وقۋشى بار بولسا, ونىڭ 50%-ى كەزەكشى سىنىپتارعا وقۋعا ءوتىنىش ءبىلدىرىپ وتىر. بۇل 3002 كەزەكشى سىنىپتى قۇرايدى.
وقۋ پروتسەسى قر ءبىلىم جانە عىلىم مينيسترلىگىنىڭ ادىستەمەلىك ۇسىنىمدارىنا سايكەس جۇرگىزىلەدى:1) ساباقتىڭ ۇزاقتىعى - 40 مينۋت; 1 - سىنىپتا-ساتىلى رەجيم;2) ءار سىنىپ ءۇشىن ءار ءتۇرلى ۋاقىتتاعى ۇزىلىستەر;3) ماسكالاردى كيۋ رەجيمىن قامتاماسىز ەتۋ;4) وقۋ ۇستەلدەرىن 1 مەتر قاشىقتىقتا ورنالاستىرۋ;5) ءبىلىم الۋشىلارعا جەكە پارتا مەن ورىندىقتى بەكىتۋ;6) ءبىلىم الۋشىلاردىڭ جەكە وقۋ ماتەريالدارىن پايدالانۋى (وقۋلىقتار, داپتەرلەر, كەڭسە زاتتارى جانە ت. ب.);7) ءار ساباقتان كەيىن كابينەتتەردى جەلدەتۋ, كۆارتستاۋ.
"اتا-انالار بالالاردى كەزەكشى سىنىپتاردا وقۋعا جىبەرە وتىرىپ, بالالاردىڭ قوعامدىق ورتادا بولاتىندىعىنا تۇسىنىستىكپەن قاراپ وتىر. كوروناۆيرۋس ينفەكتسياسىن جۇقتىرۋدى بولدىرماۋ ءۇشىن بارلىق قاجەتتى شارالار قابىلداناتىن بولادى, – دەدى ورتالىق كوممۋنيكاتسيالار قىزمەتىندە وتكەن بريفينگ بارىسىندا نۇر-سۇلتان قالالىق ءبىلىم باسقارماسىنىڭ باسشىسى شولپان قادىروۆا. – بالالاردىڭ قاۋىپسىزدىگى ءۇشىن مەكتەپتەر قاجەتتى جابدىقتارمەن جانە دەزينفەكتسيالىق قۇرالدار قورىمەن قامتاماسىز ەتىلدى. كىرە بەرىستەگى دەزينفەكتسيالىق كىلەمشە, تەپلوۆيزورلار, سانيتايزەرلەر, ىلعالدى, دەزينفەكتسيالىق جيناقتاردى قامتاماسىز ەتۋگە ارنالعان قۇرالدار".
اتا-انالار ءوز بالالارىنا الەۋمەتتىك قاشىقتىقتى ساقتاۋ قاجەتتىلىگى تۋرالى ءتۇسىندىرۋى ءتيىس. بالالاردى اتا-انالارى مەكتەپتىڭ سىرتقى ەسىگىنە دەيىن اپارىپ, ساباق اياقتالعاننان كەيىن الىپ كەتەدى. ياعني, اتا-انالار مەكتەپ ىشىنە كىرگىزىلمەيدى.