ورالدا ۇشاق قۇلادى

وقيعا ورنىنا باتىس قازاقستان وبلىستىق توتەنشە جاعدايلار دەپارتامەنتىنىڭ جەدەل قۇتقارۋ جاساعى جانە پوليتسيا قىزمەتكەرلەرى جەتكەن. بىراق, وكىنىشكە قاراي ۇشقىش, ياعني ۇشاق يەسى پاۆەل ەروشەنكو جەدەل جاردەم جەتكەنگە دەيىن قازا تاپقانى بەلگىلى بولدى.

- اپات بولعان جەرگە توتەنشەلىكتەردىڭ 4 كولىگى, 18 قىزمەتكەر باردى. ۇشقىش سول جەردە قازا تاپقان. باسقا زارداپ شەككەندەر جوق, - دەپ حابارلادى باتىس قازاقستان وبلىستىق توتەنشە جاعدايلار دەپارتامەنتى.

مارقۇم پاۆەل ەروشەنكو 1951 جىلى تۋعان, ول ءۇش مىڭ ساعاتتىق ۇشۋ ءوتىلى بار تاجىريبەلى ۇشقىش بولعان. جاقىن تۋىستارىنىڭ ايتۋىنشا, «مەچتا» دەپ ات قويعان وسى ۇشاعىن ون جىلدان بەرى ءوزى قۇراستىرعان ەكەن. وتكەن سەنبى, 22 تامىز كۇنى ۇشاعىن اۋەگە تۇڭعىش رەت كوتەرىپ, الاڭقايدى اينالىپ, امان-ەسەن قونعان كورىنەدى.

پاۆەل الەكسەەۆيچتى بىلەتىندەر سان قىرلى, رومانتيك ادام ەدى دەپ ەسكە الىپ جاتىر. ول ولەڭ جازىپ, ءان شىعارعان, جەرگىلىكتى كوركەمونەرپازدار كونتسەرتتەرىنە قاتىسىپ, ونەر كورسەتىپ جۇرگەن. الەۋمەتتىك جەلىلەردە پاۆەل ەروشەنكونىڭ ولەڭدەرى, ەستەلىك جازبالارى, ءان ايتقان ۆيدەوجازبالارى ساقتالعان.