الماتى وبلىسىندا سۋارمالى كەزەڭ ءساتتى اياقتالدى

بيىل الماتى وبلىسىنداعى وزەندەرىنىڭ سۋ دەڭگەيىنىڭ تومەن بولۋىنا بايلانىستى «قازسۋشار» رمك وڭىردەگى شارۋا قوجالىقتارىن سۋارمالى سۋمەن قامتاماسىز ەتۋ ءۇشىن اۋقىمدى جۇمىستار جۇرگىزگەن بولاتىن. اتاپ وتسەك, بىرقاتار گيدروبەكەتتەر مەن سۋ توراپتارى سالىندى. سۋ دەڭگەيى تاۋلىك بويى باقىلاۋعا الىندى. ارنايى مامانداردان قۇرىلعان كوميسسيا سۋ تاپشىلىعى بايقالعان ايماقتارعا بارىپ, سۋارمالى سۋدىڭ تەڭ ءبولىنۋىن قاداعالادى.

"سۋ دەڭگەيىنىڭ تومەن بولۋىنا بايلانىستى "قازسۋشار" رمك الماتى وبلىستىق بولىمشەسىنىڭ ماماندارى وڭىردەگى وزەندەر بويىنشا سۋ بەرىلۋ ءتارتىبىن ازىرلەدى. جەرگىلىكتى شارۋا قوجالىقتارىنىڭ باسشىلارىمەن بىرلەسە وتىرىپ, سۋ بەرۋ كەستەسىن دايىندادىق. سوڭعى ءبىر ايدىڭ ىشىندە وڭىردە سۋ تاپشىلىعى جويىلىپ, جاعداي تۇراقتالدى دەپ ايتۋعا بولادى", دەدى سمايىل قۋمەتوۆ.

كۇردەلى كەزەڭدە قالىپتاسقان اقسۋ اۋدانىنداعى سۋ تاپشىلىعى ماسەلەسىن وڭتايلى شەشكەنى ءۇشىن "كەلەشەك", كۆيتكو جانە "قىلىشبەكوۆ" سىندى جەرگىلىكتى شارۋ قوجالىقتارىنىڭ باسشىلارى دا گيدروتەحنيك ماماندارعا العىسىن ايتتى. تاۋلىك بويى كەزەكشىلىك جاساپ, سۋارمالى جەرلەرگە سۋ جەتكىزگەنى ءۇشىن ريزاشىلىعىمىزدى بىلدىرەمىز دەدى شارۋالار.

بۇگىنگى تاڭدا وبلىس بويىنشا ءتورت اۋداندا سۋارمالى سۋ تاسىمالداۋ جەلىلەرىن قايتا جاڭعىرتۋ جۇمىستارى اياقتالۋعا جاقىن. ولار الاكول, اقسۋ, كوكسۋ جانە ەسكەلدى اۋداندارى. اتالمىش ەلدى مەكەندەردەگى سۋارمالى جەرلەردىڭ جالپى اۋماعى 35,4 مىڭ گەكتاردى قۇرايدى. يسلام دامۋ بانكى وسى وڭىرلەردەگى سۋ نىساندارىن قالپىنا كەلتىرۋ ءۇشىن 18 ملرد. تەڭگە قاراجات بولگەن. وسىلايشا بۇگىنگى تاڭدا ەسكەلدى اۋدانىنداعى مەحانيكالىق تازارتۋ جۇمىستارى 80%-عا, بەتون كانالداردى جاڭارتۋ جۇمىستارى 90%-عا اياقتالعان. ال, اقسۋ اۋدانىنداعى قايتا جاڭعىرتۋ جۇمىستارى 2021 جىلدىڭ ءۇشىنشى توقسانىندا مارەسىنە جەتەدى دەپ جوسپارلانۋدا دەدى س.قۋمەتوۆ.

ايتا كەتەيىك, "قازسۋشار" رمك الماتى وبلىستىق بولىمشەسى 7 اۋدان مەن 2 قالاعا سۋ ارنالارى ارقىلى سۋارمالى سۋ بەرەدى. ولار الماتى وبلىسىنىڭ اقسۋ, الاكول, ەسكەلدى, قاراتال, كوكسۋ, پانفيلوۆ, ۇيعىر اۋداندارى مەن قاپشاعاي جانە تالدىقورعان قالالارى. بولىمشە بالانسىندا 15 سۋ جيناۋ تورابى, 9 سۋ قويماسى جانە 5 مىڭ شاقىرىمدىق سۋ تاراتۋ جەلىلەرى بار. ول ارقىلى 8 اۋداننىڭ شارۋا قوجالىقتارىنا سۋارمالى سۋ جەتكىزىلۋدە. 

بيىلعى جىلدىڭ العاشقى 6 ايىندا "قازسۋشار" رمك الماتى وبلىستىق بولىمشەسى 7 مىڭنان استام شارۋ قوجالىعىمەن كەلىسىمشارت جاساسقان. قازىرگى تاڭدا كورسەتىلگەن قىزمەت شەڭبەرىندە 441 880,0 مىڭ تەكشە مەتر سۋ تاراتىلعان. ال مەجەلەنگەن جوسپار 397 526 مىڭ تەكشە مەتر بولاتىن. وسىلايشا جوسپاردى ورىنداۋ كورسەتكىشى 120%-دى قۇرادى.

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.