تۇركىستان وبلىسىندا بيىل 6500 ادامدى جاستار پراكتيكاسىنا جولداۋ جوسپارلانعان, - دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
تامىز ايىنىڭ 1-نە دەيىن 1360 كاسىپورىنعا 4571 ازامات (70,3%) جولدانسا, ونىڭ 800-ءى مەرزىمىن اياقتاعان, ال 117-ءسى تۇراقتى جۇمىسقا ورنالاسقان.
ال, 2019 جىلى جوسپار بويىنشا 5435 جاس پراكتيكادان ءوتۋ كەرەك بولسا, 1858 كاسىپورىنعا 6783 ادام قابىلدانعان. ونىڭ 6637-ءسى مەرزىمىن ءساتتى اياقتاسا, 2274-ءى باعدارلامانىڭ كومەگىمەن تۇراقتى جۇمىسقا ورنالاسقان.
نەگىزىنەن جاستار پراكتيكاسى جوباسى ءبىلىم بەرۋ ۇيىمدارىنىڭ تۇلەكتەرى العان كاسىبى (ماماندىعى) بويىنشا باستاپقى جۇمىس تاجىريبەسىن جيناقتاۋ ءۇشىن ارنايى قولعا الىنعان. جاستار پراكتيكاسىنا 29 جاستان اسپاعان جۇمىسسىزدار وقۋدى اياقتاعاننان كەيىن 3 جىل ىشىندە جىبەرىلەدى.
جوعارى وقۋ ورنىن بىتىرگەن تۇلەكتەر جاستار پراكتيكاسىنان 6 اي ءجۇرىپ وتەدى. تيىسىنشە اي سايىن ەڭبەكاقىسى تولەنەدى. جاستار پراكتيكاسىنا قاتىسۋ ءۇشىن حالىقتى جۇمىسپەن قامتۋ ورتالىقتارىنا جۇمىسسىز رەتىندە تىركەلۋ كەرەك.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز