قازاقستان ەكونوميكاسىنىڭ دامۋىن حالىقارالىق رەيتينگتىك اگەنتتىكتەر وڭ باعالاۋدا. بۇل تۋرالى ۇكىمەت وتىرىسىندا قر ۇلتتىق ەكونوميكا ءمينيسترى رۋسلان دالەنوۆ ايتتى, دەپ حابارلايدى Egemen.kz قازاقپاراتقا سىلتەمە جاساپ.
وتىرىستا ەلدىڭ 2021-2025 جىلدارعا ارنالعان الەۋمەتتىك-ەكونوميكالىق دامۋ بولجامىن جاريالاعان ءمينيستردىڭ ايتۋىنشا, ول 2019 جىلعى جالپى ىشكى ءونىم بويىنشا ەسەپتىك ستاتيستيكالىق دەرەكتەر, وسى جىلدىڭ قاڭتار-شىلدەسىندەگى ەكونوميكانىڭ دامۋ قورىتىندىلارى سىندى فاكتورلار ەسكەرە وتىرىپ ازىرلەنگەن.
الەمدىك ەكونوميكانىڭ ءوسۋى بويىنشا حالىقارالىق قارجى ۇيىمدارىنىڭ جاڭارتىلعان بولجامدارى دا قاپەرگە الىنعان.
"كوروناۆيرۋس ىندەتى اياسىندا بيىل الەمدىك ەكونوميكا 4,9 پايىزعا تومەندەپ, 2021 جىلى 5,4 پايىزعا دەيىن وسەدى دەگەن بولجام بار. الەمدىك تاۋار نارىقتارىنداعى ۇردىستەر دە ەسكەرىلدى. حالىقارالىق قارجى ۇيىمدارىنىڭ 2021-2022 جىلدارعا ارنالعان مۇناي باعاسىنا كونسەنسۋس-بولجامى ءبىر باررەلىنە تيىسىنشە 45 جانە 55 دوللارىن قۇرايدى. قازاقستان ەكونوميكاسىنىڭ دامۋىن حالىقارالىق رەيتينگتىك اگەنتتىكتەر وڭ باعالاۋدا. Moody's جانە FitchRatings رەيتينگتىك اگەنتتىكتەرى قازاقستاننىڭ رەيتينگىن ينۆەستيتسيالىق سەنىمدىلىك دەڭگەيىندە راستادى. ولاردىڭ ىشىندە, جاقىندا, وسى جىلدىڭ 21 تامىزىندا FitchRatings اگەنتتىگى "تۇراقتى" بولجامىمەن "BBB" دەڭگەيىندە رەيتينگتى ناقتىلادى. FitchRatings پىكىرىنشە, قازاقستاننىڭ رەيتينگى ەكونوميكانىڭ فيسكالدىق تۇراقتىلىعىن, ەكونوميكانى قولداۋدىڭ ءتيىمدى شارالارىن جانە اقشا-كرەديت ساياساتىن ءساتتى جۇرگىزۋدى كورسەتەدى", - دەدى رۋسلان دالەنوۆ.