مادەنيەت جانە سپورت ءمينيسترى اقتوتى رايىمقۇلوۆا ءوزىنىڭ Facebook-تەگى پاراقشاسى ارقىلى جالپاق جۇرتقا جاعىمدى جاڭالىق تاراتتى.
قازىرگى قازاق رۋحانياتىنىڭ قابىرعالى وكىلى, ەسىمى ەلگە ايگىلى كينو جانە تەاتر رەجيسسەرى, قاليبەك قۋانىشباەۆ اتىنداعى اكادەميالىق درامتەاتردىڭ كوركەمدىك جەتەكشىسى تالعات تەمەنوۆ مەملەكەتارالىق «دوستاستىق جۇلدىزدارى» سىيلىعىنىڭ لاۋرەاتى اتانىپتى.
تمد ەلدەرىنىڭ گۋمانيتارلىق ىنتىماقتاستىق كەڭەسى تاراپىنان تاعايىندالعان بۇل مارتەبەلى ماراپات عىلىم جانە ءبىلىم, مادەنيەت پەن ونەر سالاسىندا ءونىمدى ەڭبەك ەتىپ, تولايىم تابىستارعا قول جەتكىزگەن ايتۋلى تۇلعالارعا بەرىلەدى.
«موسفيلم», «قازاقفيلم» كينوستۋديالارىندا كوپشىلىك كوزايىمىنا اينالعان كوركەم فيلمدەر ءتۇسىرىپ, رەسپۋبليكا تەاترلارىنىڭ ساحناسىندا سۇبەلى سپەكتاكلدەر قويعان ساڭلاق رەجيسسەرىمىزدىڭ كەزەكتى قۋانىشقا كەنەلۋى شىنىمەن سۇيسىنەرلىك جاعداي. سوندىقتان وسىناۋ وقيعاعا وراي كورنەكتى ونەر قايراتكەرىنە قۇتتى بولسىن ايتا وتىرىپ, كورەرمەندەرىن الداعى ۋاقىتتاردا دا كوڭىل كونشىتەر كوركەمدىك الەمىنە جەتەلەي بەرۋىنە تىلەكتەستىك بىلدىرەمىز.