وسىدان بىرنەشە اي بۇرىن وتاندىق ترانسفۋزيولوگتاردىڭ COVID-19-بەن كۇرەستە وسى اۋرۋدان جازىلىپ شىققانداردى «اۋرۋ بارىسىندا اعزانىڭ قورعانىشتىق جۇيەسى (يممۋندىق جۇيەسى) بەلسەندى قيمىلداپ, قوزدىرعىشتارعا قارسى تۇراتىن انتيدەنەلەر جاساقتاي باستايدى. ال جازىلىپ شىققان سوڭ جوعارىداعى انتيدەنەلەر قان پلازماسىندا ساقتالادى. سوندىقتان ونداي پلازمانى اۋىر ناۋقاستاردى ەمدەۋگە قولدانعان ۋاقىتتا ناۋقاس بويىندا بەلسەندىلىگى تومەن ءوز يممۋنيتەتى پايدا بولا باستايدى دا, ول يممۋندىق جۇيە تولىق كۇشىنە ەنۋىنە, ءوز انتيدەنەلەرىن قالىپتاستىرۋىنا قاجەتتى ۋاقىتتى ۇنەمدەيدى» دەپ, دونور بولۋعا شاقىرعانىن جازعان ەدىك, - دەپ حابارلايدى Egemen.kz.
ەندى سوناۋ الىستا جاتقان الىپ ەل اقش-تىڭ دەنساۋلىق ساقتاۋ مينيسترلىگىنە قاراستى ءدارى-دارمەكتىڭ ساپاسىن قاداعالاۋ باسقارماسى (FDA) پلازمانى COVID-19-عا قارسى ەمگە پايدالانۋ جونىندە شۇعىل رۇقسات بەرىپ, ونى راسىمدەپ وتىرعانى جايىندا كوپتەگەن اقپارات كوزدەرى حاباردار ەتىپ جاتىر.
CNN «پلازمانىڭ ەمدەگى ارتىقشىلىعى ونىڭ بولۋى ىقتيمال قاۋىپىنەن الدەقايدا جوعارى» دەپ دونالد ترامپتىڭ رۇقساتتى اق ۇيدەگى بريفينگتە جاريا ەتكەنىن حابارلايدى. «مەن بۇگىن قىتايۆيرۋسپەن كۇرەس بويىنشا تاريحي مالىمدەمە جاساپ قۋانىپ تۇرمىن. بۇل سانسىز ادامدى اجال تىرناعىنان قۇتقاراتىن شارا», دەپ ترامپتىڭ مالىمدەگەنىن ربك جانە سپۋتنيك, REGNUM بۇقارالىق اقپارات قۇرالدارى دا جاريا ەتتى.
ءدارى-دارمەكتىڭ ساپاسىن قاداعالاۋ باسقارماسى پلازماعا قاتىستى كلينيكالىق زەرتتەۋلەردىڭ تولىق اياقتالماعانىنا قاراماستان, ونىڭ 70 مىڭ پاتسيەنتتى ەمدەۋدە قودانىلىپ, وڭ ناتيجە كورسەتكەنىنە قاراي شەشىم قابىلدانعانىن ايتقان.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.